United fiton “klasiken” ndaj Liverpool dhe siguron pjesëmarrjen në Champions League

Një përballje spektakolare në Premier League ka përfunduar me triumfin 3-2 të Manchester United ndaj Liverpoolit në Old Trafford, në kuadër të javës së 35-të.

Vendasit e nisën furishëm takimin, duke kaluar në avantazh që në minutën e 6-të me Matheus Cunha. Vetëm tetë minuta më vonë, Benjamin Šeško dyfishoi shifrat për “Djajtë e Kuq”.

Në pjesën e dytë, Liverpool reagoi shpejt. Dominik Szoboszlai ngushtoi diferencën në minutën e 47-të, duke përfituar nga një gabim në mbrojtje. Në minutën e 56-të, Cody Gakpo barazoi shifrat në 2-2 pas një aksioni të ndërtuar sërish nga Szoboszlai.

Megjithatë, fjala e fundit i takoi Manchester United. Në minutën e 77-të, Kobbie Mainoo shënoi golin e fitores me një goditje të saktë brenda zonës, duke vulosur rezultatin 3-2.

Me këtë sukses, Manchester United ngjitet në kuotën e 64 pikëve në vendin e tretë dhe siguron matematikisht pjesëmarrjen në Champions League për sezonin e ardhshëm.