Valverde rikthehet në stërvitje pas sherrit me Tchouameni

Mesfushori uruguaian Federico Valverde është rikthyer në stërvitje me Real Madrid, vetëm pak ditë pas përplasjes së ashpër në dhomat e zhveshjes me Aurelien Tchouameni.

Sipas mediave spanjolle, incidenti mes dy lojtarëve kishte përfunduar në një sherr fizik, ku Valverde kishte pësuar një traumë në kokë. Parashikimet e stafit mjekësor flisnin për të paktën dy javë mungesë, por uruguaiani ka surprizuar duke u rikthyer shumë më shpejt se sa pritej në grup.

Ky rikuperim i shpejtë pritet ta bëjë Valverde-n të gatshëm për sfidat e fundit të kampionatit ndaj Sevilla dhe Athletic Bilbao.

Megjithatë, klubi madrilen ka vendosur të reagojë ashpër për ngjarjen jashtë fushës. Drejtuesit e “Los Blancos” kanë ndëshkuar si Valverde-n ashtu edhe Tchouameni-n me nga 500 mijë euro gjobë secilin për shkelje disiplinore.

Përveç aspektit fizik dhe financiar, në Madrid shqetësim mbetet edhe atmosfera brenda skuadrës. Shtypi madrilen raportoi se sjellja e Valverde-s gjatë sezonit ka krijuar tensione me pjesën tjetër të grupit, duke sjellë pakënaqësi të dukshme në dhomat e zhveshjes.