Vëllai i Kylian Mbappe rrezikon deri në 5 ndeshje pezullim në Champions League

Ethan Mbappé mund ta paguajë shtrenjtë episodin e ndodhur në përballjen mes Lille dhe Real Betis. Mesfushori francez u ndëshkua me karton të kuq në minutën e 56-të, në ndeshjen që Lille e humbi 3-2, dhe tashmë rrezikon një pezullim të gjatë nga UEFA.

Vëllai i vogël i Kylian Mbappé u përjashtua pas një goditjeje me bërryl në fytyrën e Natan, një veprim që arbitri e konsideroi sjellje të dhunshme. Kartoni i kuq e detyron automatikisht të mungojë në ndeshjen e ardhshme evropiane të Lille ndaj Arsenalit, e programuar për 13 tetor.

Megjithatë, mungesa e tij mund të zgjasë shumë më tepër. Sipas L’Équipe, rregullorja disiplinore e UEFA-s parashikon masa të ashpra për episode që klasifikohen si “sjellje brutale” apo “akt dhune”. Në një rast të tillë, Ethan Mbappé mund të dënohet me një pezullim minimal prej tre ndeshjesh.

Por ndëshkimi mund të shkojë edhe më tej. Nëse Komisioni i Kontrollit, Etikës dhe Disiplinës së UEFA-s e konsideron veprimin e tij si një “agresion të rëndë”, pezullimi mund të arrijë deri në pesë ndeshje.

Një dënim i tillë do të ishte një goditje e fortë për 19-vjeçarin dhe Lille, pasi do ta privonte mesfushorin nga një pjesë e konsiderueshme e sezonit në Champions League.

Vendimi përfundimtar pritet të merret deri në fund të shtatorit. Pas njoftimit të sanksionit, si Lille ashtu edhe vetë lojtari do të kenë mundësinë të paraqesin një apelim.