Pas barazimit të Portugalisë në ndeshjen hapëse të Kupës së Botës 2026 ndaj Republikës Demokratike të Kongos, kapiteni portugez Cristiano Ronaldo është përballur me kritika të shumta për paraqitjen e tij në fushë.
Përveç performancës që u konsiderua nën pritshmëri, mediat spanjolle kanë ndalur vëmendjen edhe te një episod që kaloi pothuajse pa u vënë re gjatë takimit. Sipas raportimit të gazetës sportive spanjolle Mundo Deportivo, Ronaldo kreu një gjest që është interpretuar negativisht ndaj shokëve të tij.
Ngjarja ndodhi në momentin kur João Cancelo realizoi një gol spektakolar me roveshatë. Përpara se arbitri ta anulonte golin për pozicion jashtë loje, Ronaldo ngriti krahun duke sinjalizuar vetë pozicionin e parregullt të mbrojtësit portugez.
Sipas medias spanjolle, ky veprim nuk është pritur mirë dhe shihet si një gjest që dëmton imazhin e sulmuesit 41-vjeçar, sidomos duke marrë parasysh raportet jo gjithmonë të qeta mes Ronaldos dhe Cancelo-s gjatë viteve të fundit.
Portugalia u ndal në një barazim surprizë në debutimin e saj në Botëror, ndërsa presioni mbi Ronaldon dhe skuadrën e trajnerit portugez është rritur përpara ndeshjeve të ardhshme të fazës së grupeve. Kritikat e mediave tregojnë se çdo veprim i yllit të Al Nassr vazhdon të analizohet me imtësi, veçanërisht në një turne kaq të rëndësishëm si Kupa e Botës.
Aquí está Cristiano Ronaldo pidiendo Offside en el gol de Joao Cancelo JAJAJAJAJJAJA https://t.co/FpVRY1Nqj9 pic.twitter.com/3EwP5lgV7Y
— Adan el ➐ (@AdanElSiete) June 17, 2026