Ish-sulmuesi i njohur italian, Christian Vieri, ka ndarë parashikimet e tij për Kupën e Botës 2026 në një intervistë për *La Gazzetta dello Sport*, duke e cilësuar Francën si skuadrën më të fortë të turneut.
“Franca është kombëtarja më e kompletuar, nuk ka diskutim. Janë shumë të fortë. Finalja që shoh është Francë-Argjentinë, sepse Lionel Messi është jashtë çdo logjike. Messi është si Harry Potter, bën magji edhe në moshën 39-vjeçare”, u shpreh Vieri.
Ai foli edhe për Brazilin, duke vlerësuar ndikimin e trajnerit Carlo Ancelotti, i cili sipas tij ishte vendimtar në fitoren ndaj Japonisë në fazën e 1/16-ave falë zëvendësimeve të bëra gjatë ndeshjes.
“Kush guxon ta kritikojë Ancelottin? Ai është një nga trajnerët më të mëdhenj në histori. Futja e Endrick ndryshoi ndeshjen, ndërsa Martinelli shënoi gol. Brazili ka bërë një goditje të jashtëzakonshme me emërimin e tij. Njerëzit flasin pa ditur. Do të doja të shihja kush thotë se Casemiro duhet të lihet jashtë”, deklaroi ish-bomberi italian.
Duke analizuar sfidat e ardhshme të Botërorit, Vieri u shpreh i bindur se Argjentina nuk do të hasë probleme ndaj Kepit të Gjelbër.
“Argjentina nuk humbet kurrë përballë Kepit të Gjelbër. Përveç Messit, ka Lautaron dhe Julian Alvarezin, të cilët për mua janë mes pesë sulmuesve më të mirë në botë. Për më tepër, është shumë e vështirë t’i shënosh gol Argjentinës, ndaj besoj se mund të rikthehet në finale.”
Sa i përket dueleve të tjera, Vieri parashikon një përballje të komplikuar për Spanjën ndaj Austrisë.
“Mendoj se Spanja do ta ketë shumë të vështirë me Austrinë. Ndërsa Portugali-Kroaci është një ndeshje tepër e ekuilibruar, por Portugalia është skuadra më e kompletuar”, përfundoi ai.