Vllaznia fiton finalen e mbijetesës për në Superiore me 3 “perla” (VIDEO)

Vllaznia do të vijojë të mbetet në Kategorinë Superiore edhe në sezonin e ardhshëm. Skuadra kuqeblu triumfoi 3-1 kundër Besëlidhjes në duelin e “Play Off” për një biletë në elitën e futbollit shqiptar.

Ndeshja do të zhbllokohej që në minutën e 15-të, me një goditje fantastike të Arsid Krujës në hyrje të zonës. 3 minuta më vonë, Herald Marku realizon një perlë të vërtet me një goditje shumë të fortë nga një distancë e largët.

Skuadra lezhjane nuk do të dorëzohej, teksa në minutën e 32-të Xhorxhevic do të realizonte një gol të bukur. Gjithsesi 13 minuta nga fundi i fraksionit të parë, Gilman Lika shënoi një tjetër eurogol me një goditje në hyrje të zonës.