Vllaznia në kuotën zero, tifozët protesta para bashkisë

Tifozët e Vllaznisë do të dalin në protestë para Bashkisë së Shkodrës, për keqmenaxhimin e klubit kuqeblu. Vllaznia rrezikon rënien në një kategori më poshtë, pasi në katër javët e para skuadra shkodrane ka zero pikë në klasifikim. Këtë fillim sezoni ekipi me traditë i futbollit shqiptar ku i ka humbur të 4 takimet e luajtura, dhe madje nuk njeh fitoren prej plot 12 ndeshjesh duke llogaritur këtu edhe takimet e fundit të sezonit të kaluar në Kategorinë Superiore. Një rënie e frikshme për skuadrën më të vjetër në vend, që me këtë ritme, rrezikon të bjerë për herë të parë në historinë e saj nga Kategoria. Administrimi i klubit nga Bashkia e qytetit ka rezultuar një dështim i vërtetë me Vllazninë e traditës që në këto vitet e fundit asnjëherë nuk ka qenë në gjendje të konkurrojë për titullin, apo zonën e lartë të klasifikimit, çka ka bërë që durimi i tifozëve të soset. Grupimi i organizuar i tifozëve të Vllaznisë, “Vllaznit Ultras” kanë njoftuar në rrjetet sociale se të hënën e ardhshme do të zhvillojnë një protestë masive para Bashkisë Shkodër, duke fituar të bëhen pjesë e saj të gjithë fansat e skuadrës. Në njoftim tifozët shkodranë kanë publikuar edhe kërkesat e tyre në drejtim të Bashkisë ku kërkojnë shkarkimin e menjëhershëm të stafit drejtues të klubit për paaftësi, keqmenaxhim dhe përfitime personale në kurriz të ekipit të Vllaznisë. Tifozët shkodranë kërkojnë gjithashtu dhe zgjidhjen e situatës në të cilën ndodhet klubi, nëpërmjet afrimit të një sponsori apo marrjes së tij nga një President, pasi koha ka treguar se në 4 vite Bashkia dështoi për të menaxhuar siç duhet klubin e futbollit, si dhe vënien në dispozicion të autobuzave për ata tifozë që duan të ndjekin skuadrën në transferta. Tifozët e Vllaznisë i bëjnë thirrje Kryetares së Bashkisë Shkodër Voltana Ademi që të ndërgjegjësohet për zgjidhjen e problemit të Vllaznisë, duke kërcënuar me përshkallëzim të protestave në rast se nuk plotësohen kërkesat e tyre. Voltana Ademi ka marrë drejtimin e bashkisë pak kohë më parë, dhe nga investitorë të ndryshëm përfshi edhe presidentin aktual të Kukësit, Safet Gjici ka pasur oferta për marrjen e Vllaznisë. Megjithatë, për kohën e shkurtër në detyrë dhe për kohën e gjatë që Vllaznia nuk po  tregon asgjë nga historia e saj e lavdishme, përgjegjësia duket se mbetet diku tjetër ndaj edhe tifozët thirrje kryebashkiakes Ademi që të ndërhyjë sa të mos jetë vonë.