Walker: Nuk ka mënyrë për ta ndalur Messin, por dhe Argjentina duhet të ketë frikë nga kjo Angli

Ish-mbrojtësi i Anglisë dhe Manchester Cityt, Kyle Walker, beson se Lionel Messi mbetet futbollisti më i vështirë për t’u ndalur, por thekson se edhe Argjentina duhet ta respektojë forcën e “Tre Luanëve” në prag të gjysmëfinales së Kupës së Botës 2026.

Walker, i cili është përballur disa herë me Messin gjatë ndeshjeve mes Manchester Cityt dhe Paris Saint-Germain në Ligën e Kampionëve, pranoi se edhe kur mendon se e ke neutralizuar, argjentinasi është në gjendje të vendosë fatin e ndeshjes me një moment magjie.

“Nëse do ta dija si ndalet Lionel Messi, ndoshta do të isha trajneri më i madh i të gjitha kohërave. Shumë kanë provuar dhe kanë dështuar. Messi është Messi. Edhe në këtë Botëror ka treguar se, kur vendos të ndizet, Argjentina ka ende një lojtar të jashtëzakonshëm tek i cili mund të mbështetet”, tha Walker.

Ai kujtoi edhe një përballje në Champions League, kur City kishte arritur ta mbante nën kontroll yllin argjentinas për pjesën më të madhe të ndeshjes.

“Kur luanim kundër PSG-së, e kontrolluam për rreth 70 minuta. Pastaj bëri një kombinim me Kylian Mbappé dhe e dërgoi topin në trekëndësh. Ke punuar gjithë ndeshjen për ta ndalur dhe ai të ndëshkon në një çast. Pikërisht për këtë arsye është ndoshta futbollisti më i madh i historisë”, u shpreh anglezi.

Sipas Walker, dobësia e vetme e Messit mund të jetë fakti se nuk ndihmon shumë në mbrojtje, por Argjentina është ndërtuar në mënyrë që ta lejojë atë të ruajë energjitë për momentet vendimtare.

“Ndoshta nuk kthehet shumë prapa për të mbrojtur, por ka një skuadër që punon për të. Shokët e tij e dinë se çfarë mund të sjellë ai dhe i krijojnë kushtet për të bërë diferencën. Kështu Argjentina fitoi edhe Botërorin e vitit 2022”, theksoi ai.

Walker nuk është i bindur se markimi individual do të ishte zgjidhja e duhur ndaj Messit.

“Po diskutonim në klub nëse duhej markuar njeri me njeri. Mendoj se kjo nuk do të funksiononte. Përkundrazi, ai do ta merrte si një sfidë personale për të treguar se askush nuk mund ta ndalë në atë mënyrë. Më mirë të mos e provokosh”, deklaroi ish-mbrojtësi.

Ai foli edhe për marrëdhënien e Messit me Sergio Agüeron, ish-shokun e tij te Manchester City.

“Agüero më ka thënë gjithmonë se Messi është një njeri shumë i thjeshtë, por ka rregullat e tij dhe i ka fituar ato me atë që ka arritur në futboll. Tetë ‘Topa të Artë’ flasin vetë”, u shpreh Walker.

Anglezi tregoi gjithashtu se ruan me krenari fanellën e Messit, të cilën e mori pas një ndeshjeje në Champions League.

“E kam fanellën e tij në shtëpi dhe është një nga kujtimet më të çmuara që kam. Nuk jam nga ata që kërkoj fanellën e çdo kundërshtari, por për Messin nuk hezitova. E ruajta si një thesar gjatë gjithë rrugës për në shtëpi”, tha ai.

Walker vlerësoi edhe dy lojtarë të tjerë të Argjentinës, Nicolás Otamendi dhe Julián Álvarez.

“Otamendi është një luftëtar i vërtetë. Ndoshta teknikisht nuk është si John Stones apo Vincent Kompany, por është lojtari që do ta doje gjithmonë pranë në betejë. Ndërsa Julián Álvarez ka bërë zgjedhjen e duhur duke kaluar te Atlético Madrid, ku është kthyer në pikën kryesore të sulmit”, u shpreh ai.

Megjithatë, Walker beson se vëmendja nuk duhet të përqendrohet vetëm te Messi.

“Ne jemi një skuadër mjaft e fortë që edhe Argjentina të shqetësohet për ne. Nuk duhet të mendojmë vetëm se si ta ndalim Messin. Kemi lojtarë si Harry Kane, Jude Bellingham dhe John Stones, që mund të bëjnë diferencën. Kjo është sfida më e madhe deri tani, por edhe një mundësi e artë që Anglia nuk duhet ta humbasë”, përfundoi ai.