Granit Xhaka vazhdon të shkruajë historinë me fanellën e Zvicrës. Kapiteni i helvetikëve arriti një tjetër moment të jashtëzakonshëm në karrierën e tij, duke zhvilluar ndeshjen e 150-të me kombëtaren dhe duke u bërë futbollisti i parë në historinë e Zvicrës që arrin këtë shifër.
Mesfushori 33-vjeçar e festoi rekordin në mënyrën më të mirë të mundshme, duke udhëhequr skuadrën drejt fitores 2-0 ndaj Algjerisë në fazën e 1/16-ave të Kupës së Botës 2026. Ky sukses i siguroi Zvicrës kualifikimin në 1/8-at dhe i dha fund një pritjeje që zgjaste që nga viti 1938 për një fitore në fazën me eliminim direkt të Botërorit.
Pas ndeshjes, Xhaka u shpreh krenar për arritjen personale, por theksoi se suksesi i ekipit mbetet prioriteti kryesor.
“Është një privilegj i madh të vesh fanellën e Zvicrës për herë të 150-të. Ky vend më ka dhënë shumë mua dhe familjes sime. Shpresoj që ky të mos jetë kapitulli i fundit me kombëtaren”, deklaroi kapiteni.
Ai vlerësoi paraqitjen e skuadrës, duke theksuar se në ndeshjet me eliminim direkt rëndësi ka vetëm rezultati.
“Nuk ka rëndësi sa bukur luan, por të arrish kualifikimin. Ne e bëmë këtë dhe jemi shumë të lumtur. Mbrojtja funksionoi shumë mirë dhe ruajtja e portës së paprekur na jep besim për vazhdimësinë”, tha Xhaka.