Xhaka i befason të gjithë, ka një mesazh për Arsenalin

Përplasjet në distancë me tifozët mendohej se do ta detyronin të largohej.

Por, një gjë e tillë nuk e ndalon mesfushorin me origjinë shqiptare, Granit Xhaka. 27-vjeçari ka pohuar se pavarësisht kësaj do të jap gjithçka për të qëndruar në Londër.

“Nuk jam nga ata lojtarë që vajton mundësitë e humbura. Unë jam gjithmonë duke kërkuar sfida të reja. Por, një gjë është e sigurtë. Unë do të luftoj në çdo seancë stërvitore për të qëndruar te Arsenali. Ndjej që javën e ardhme do të jem gati,” deklaroi Xhaka për gazetën zviceriane, “Blick”.

Dy javë më parë, Xhaka u largua i revoltuar nga fusha, pas thirrjeve të vazhdueshme të tifozëve të Arsenal, ku kërcënonin me fjalë nga më të ndryshme atë dhe familjen e tij. Aktualisht, mesfushori është grumbulluar me kombëtaren e Zvicrës për dy sfidat e fundit eliminatore të Euro 2020 ndaj Gjeorgjisë dhe Gjibraltarit.