Yildiz: Krenar për grupin, tani mendojmë për sfidën me Kosovën

Turqia mori një fitore të rëndësishme minimale 1-0 ndaj Rumanisë, duke prerë biletën për finalen e “play-off”-it të Botërorit, ku do të përballet me Kosovën.

Një nga protagonistët e sfidës ishte talenti i Juventus, Kenan Yıldız, i cili pas ndeshjes analizoi performancën e skuadrës, duke theksuar vështirësitë e hasura, veçanërisht në pjesën e parë.

“Gjatë pjesës së parë nuk arritëm të gjenim rrugën e rrjetës. Kishte shumë presion mbi mua, me tre lojtarë që më markonin vazhdimisht”, u shpreh sulmuesi turk, duke nënvizuar vëmendjen e lartë mbrojtëse nga kundërshtarët.

Sipas tij, kthesa erdhi pas pushimit: “Në pjesën e dytë shënuam dhe loja jonë u përmirësua ndjeshëm”.

Yıldız vlerësoi gjithashtu forcën e grupit dhe shpirtin kolektiv që çoi në këtë sukses: “Jam shumë krenar për skuadrën. Kemi një grup të fortë dhe të bashkuar”.

Sulmuesi nuk e fshehu as vështirësinë e përballjes: “Ishte një ndeshje e komplikuar ndaj një kundërshtari shumë fizik”.

Tashmë vëmendja e Turqisë zhvendoset te finalja vendimtare për një vend në Kupën e Botës 2026.

“Do të japim maksimumin në ndeshjen e radhës. Fillimisht duhet të rikuperojmë dhe të përgatitemi sa më mirë”, përfundoi Yildiz.