Zidane, trajneri i 11-të në 12 vitet e Perez si president i Realit

Me shkarkimin e Rafael Benitez Reali i Madridit ka emëruar trajner të ri francezin Zinedine Zidane. Me këtë lëvizje shkon në plot 11 numri i teknikëve që ka patur Reali i Madridit gjatë 12 viteve me Florentino Perezin, si president. Numri 1 i Los Blancos shquhet për lëvizje trajnerësh pasi askush nuk ka arritur të rezistojë më shumë 3 vjet me të në krye të Real Madrid.

Perez kur fitoi mandatin e parë si president i Realit në vitin 2000, në atë periudhë, 68-vjecari madrilen gjeti në drejtimin e skuadrës një emër të shquar si Vicente Del Bosque, i cili mbijetoi në stolin e Los Blancos deri në qershor të 2003-shit. Vendimi i Perez-it për të lejuar largimin e një tekniku si Del Bosque që në 3 sezone e gjysmë fitoi 2 tituj të La Ligas dhe 2 Champions League vazhdon të mbetet edhe sot e kësaj dite një nga më të diskutuarit.

Del Bosque me portugezin Jose Mourinho është një nga dy trajnerët që ka rezistuar për më shumë kohë me Perez, plot 2 vjet e 11 muaj secili.

Vendin e Del Bosques e mori portugezi Carlos Querioz, i cili u pasua nga Jose Antonio Camacho, Mariano Garcia Ramon, Vanderlei Luxemburgo dhe Juan Ramon Lopez Caro. Ky i fundit është edhe trajneri më jetëshkurtër me Perez si president pasi qëndroi në stolin e Realit nga data 4 Dhjetor 2005 deri në 27 Shkurt të 2006-ës.

Juan Ramon Lopez Caro ndan edhe periudhën 12-vjeçare të presidencës së Florentino Perez, pasi biznesmeni spanjoll u largua nga detyra në vitin 2006-të për t’u rikthyer në 2009-ën. Me fitimin e mandatit të dytë si president Perez në Qershor të 2009-ës emëroi Manuel Pellegrini si trajner të ri. Kiliani qëndroi në krye të Realit për vetëm 1 sezon. Në Maj të 2010-ës, drejtimin e “Los Blancos” e mori Jose Mourinho i cili qëndroi në krye të skuadrës merengues deri në përfundim të kontratës, duke u larguar në qershor të 2013-ës.

Edhe 1 vit e 11 muaj zgjati eksperienca e Carlo Ancelottit që mori drejtimin e Realit pas largimit të portugezit. Fitimi i “La Decimas” në Champions League nuk i mjaftoi trajnerit italian, i cili u shkarkua nga Perez. Verën e kaluar presidenti i Los Blancos emëroi Rafael Benitez  trajner të ri, por aventura e trajnerit spanjoll në krye të Realit zgjati shumë pak.

Perez pasditen e së hënës largoi nga detyra ish teknikun e Napolit dhe të Liverpulit, duke emëruar francezin Zinedine Zidane, si trajner të ri.