Massimiliano Allegri është zyrtarisht trajneri i ri i Napolit. Pas largimit të Antonio Contes, presidenti Aurelio De Laurentiis i ka besuar pankinën teknikut italian, i cili ka firmosur një kontratë që do ta mbajë në krye të skuadrës deri më 30 qershor 2029.
Lajmi u bë publik nga vetë klubi napolitan përmes një njoftimi zyrtar, ndërsa presidenti De Laurentiis e konfirmoi emërimin edhe me një postim në rrjetin social X.
“Napoli i uron mirëseardhjen Massimiliano Allegrit, i cili merr drejtimin e ekipit të parë. Trajneri ka firmosur një kontratë që e lidh me klubin deri më 30 qershor 2029”, thuhet në komunikatën e klubit.
Sipas mediave italiane, marrëveshja mes Napolit dhe Allegrit është trevjeçare, me një pagë prej 4.5 milionë eurosh neto në sezon. Shuma është pak më e ulët se 5 milionë eurot që tekniku përfitonte gjatë sezonit të fundit te Milani, me të cilin kishte kontratë deri në qershor të vitit 2027.
Për Allegrin kjo është hera e dytë që pason Antonio Conten në pankinën e një klubi të Serie A. E njëjta situatë ndodhi edhe në vitin 2014, kur ai mori drejtimin e Juventusit pas largimit të Contes.
Në prezantimin e tij, Napoli rikujtoi edhe karrierën e pasur të 57-vjeçarit. Pas përfundimit të karrierës si futbollist, ku në sezonin 1997/98 veshi edhe fanellën e Napolit, Allegri nisi rrugëtimin si trajner në vitin 2003. Ai udhëhoqi Sassuolon drejt ngjitjes historike në Serie B, përpara se të debutonte në elitën e futbollit italian me Cagliarin.
Në vitin 2010 mori drejtimin e Milanit, me të cilin fitoi titullin kampion të Italisë dhe Superkupën Italiane. Më pas, në periudhën 2014-2019, drejtoi Juventusin, ku ndërtoi një cikël dominues me pesë tituj radhazi në Serie A, katër Kupa të Italisë, dy Superkupa dhe dy finale të UEFA Champions League.
Pas një rikthimi te Juventusi, ku fitoi edhe Kupën e pestë të Italisë në vitin 2024, Allegri rikthehet tani në Napoli me objektivin për ta mbajtur skuadrën në nivelet më të larta të futbollit italian dhe evropian.
“Mirë se erdhe, Mister Allegri!”, përfundon mesazhi i klubit napolitan.