ZYRTARE/ City njoftimin largimin e Bernardo Silvës në fund të sezonit

Manchester City ka konfirmuar zyrtarisht se mesfushori portugez Bernardo Silva do të largohet nga klubi gjatë merkatos së verës, duke i dhënë fund një periudhe të gjatë dhe të suksesshme në “Etihad”.

Në njoftimin zyrtar, klubi anglez bëri të ditur se 31-vjeçari, i cili iu bashkua skuadrës në vitin 2017, do të mbyllë aventurën e tij pas nëntë sezonesh, gjatë të cilave regjistroi plot 451 ndeshje me fanellën e City-t.

Gjatë kësaj periudhe, Silva ishte një nga protagonistët kryesorë të epokës më të artë në historinë e klubit, duke kontribuar në fitimin e 19 trofeve madhorë. Mes tyre spikasin 6 tituj të Premier League, një UEFA Champions League, 2 Kupa të Anglisë, 5 Kupa të Ligës, 3 Community Shield, si dhe Botërorin e Klubeve dhe UEFA Super Cup. Trofeu i fundit i fituar ishte Kupa e Ligës në vitin 2026, pas finales ndaj Arsenal FC.

Statistikat e tij flasin qartë për ndikimin në skuadër: 76 gola dhe 77 asistime, duke u renditur gjithashtu në mesin e 10 lojtarëve me më shumë paraqitje në historinë e klubit.

Pavarësisht njoftimit për largimin, Bernardo Silva do të vijojë të jetë i fokusuar me skuadrën deri në fund të sezonit, ndërsa City mbetet në garë për titullin kampion dhe FA Cup, nën drejtimin e trajnerit Pep Guardiola.

Në përfundim të deklaratës, klubi theksoi se portugezi do të kujtohet si një nga lojtarët më të rëndësishëm në historinë e Manchester City-t dhe se do të nderohet siç duhet në fund të sezonit.