Liverpooli zyrtarizon trajnerin e ri, ja kush zëvendëson Slot

Liverpool ka zyrtarizuar emërimin e teknikut spanjoll Andoni Iraola si trajnerin e ri të skuadrës, duke i dhënë fund aventurës së Arne Slot në stolin e “The Reds”.

Vendimi për shkarkimin e trajnerit holandez vjen vetëm një vit pasi ai udhëhoqi ekipin drejt triumfit në Premier League, por rezultatet e sezonit të fundit nuk bindën drejtuesit e klubit.

Iraola mbërrin në “Anfield” pas një edicioni mjaft pozitiv me Bournemouth-in, skuadër që e renditi në vendin e gjashtë në kampionat dhe e kualifikoi për në Europa League. Trajneri 43-vjeçar kishte bërë të ditur që në muajin prill se do të largohej nga Bournemouth-i në fund të sezonit, ndërsa emri i tij ishte lidhur me disa klube të mëdha evropiane, përfshirë Crystal Palace dhe Milan.

Liverpool-i siguroi pjesëmarrjen në Champions League për sezonin e ardhshëm, por paraqitjet në kampionat mbetën larg pritshmërive. Ekipi e mbylli sezonin me 60 pikë, plot 25 më pak se kampioni Arsenal.