Rezultati i gjigantit të shitjeve me pakicë, Amazon, theu pritshmëritë e analistëve, por të ardhurat dhe udhëzimi për tremujorin e katërt zhgënjyen, gjë që solli një rënie të madhe të vlerës në treg.
Kompania dha një udhëzim për të ardhurat në fund vit në segmentin $66.5 miliard – 72.5 miliard dollarë, shumë poshtë projeksioneve prej 73.8 miliardë dollarë. Tremujori i katërt është edhe periudha më e rëndësishme e shitjeve të Amazon, për shkak të sezonit të pushimeve.
Aksionet e Amazon ranë me 10%, në 1,600 dollarë për aksion, që është rënia më e madhe që prej Janarit 2014. Të ardhurat nga shitja u rritën me 29% me bazë vjetore, ndërsa shitjet në Amerikën e veriut u rritën me 35%, në 34.3 miliardë dollarë.
Nga ana tjetër, të ardhurat neto u rritën më shumë se 10-fish nga e njëjta periudhë një vit më parë, në një nivel rekord prej 2.8 miliardë dollarë, duke shënuar tremujorin e katërt radhazi që fitimi kalon 1 miliardshin.
Raporti i Amazon vjen në një kohë të shitjeve nën panik të sektorit të teknologjisë. Gjiganti tjetër, Google, ra me 7% pas publikimit të rezultatit për tremujorin.
Të ardhurat e Google u rritën me 21%, në 33.74 miliardë dollarë, duke dështuar të arrijnë projeksionet.
Të ardhurat nga reklamimi, përbënin 86% të totalit. Kompania theksoi luhatjet jo të favorshme në valutë për ngadalësimin e të ardhurave. Sipas analistëve, çmimi më i ulët i reklamave për të kënaqur rregullatorët, ligjet e reja mbi privatësinë në Europë si dhe konkurrenca më e ashpër me Amazon, kanë luajtur një rol gjithashtu.
Të ardhurat jo nga reklamat, që përfshijnë shitjet e aplikacioneve për celularë dhe shërbimet cloud, dështuan gjithashtu të arrijnë projeksionet. Fitimi neto i Google arriti në 9.2 miliardë dollarë, apo 13.06 dollarë për aksion.