200 mln euro nga fasonet – Rritje me 35% krahasuar me një vit më parë

Sektori i fasoneve i ka sjellë ekonomisë shqiptare 200 milionë euro në gjysmën e parë të këtij viti. Sipas të dhënave nga Banka e Shqipërisë, të ardhurat nga shërbimet e përpunimit të mallrave të porositësve jashtë vendit u rritën me 35% krahasuar me të njëjtën periudhë të një viti më parë. Fasonet ngelen kolona kryesore ku mbështeten eksportet shqiptare, me rreth 44% të volumeve totale vjetore.

Ky biznesi i rezistoi mirë krizës dhe në dekadën e fundit përgënjeshtroi parashikimet për një perëndim gradual, si pasojë e konkurrencës nga tregjet e Azisë dhe Europës, ku krahu i punës është edhe më i lirë. Ai është i përqendruar kryesisht tek prodhimi i veshjeve dhe këpucëve me porosi nga jashtë, por, në vitet e fundit, ka një zgjerim të spektrit të produkteve që prodhohen në Shqipëri.

Një degë e rëndësishme e industrisë fasone është edhe përpunimi i produkteve të detit dhe sidomos i açugeve. Fasoneria ka hyrë edhe në degë më specifike dhe që kërkojnë një shkallë relativisht të lartë specializimi, si për shembull elektromotorët. Në total, ekonomia shqiptare përfitoi në gjysmën e parë të vitit 2018, 520 milionë euro nga shërbimet e eksportuara.

Pjesën kryesore e zënë pikërisht fasonet dhe turizmi, por këtyre iu shtohen edhe shërbimet që nuk lidhen me përpunim të mallrave, si shërbimet call center apo ato të teknologjisë së informacionit për kompani të huaja.