Luani në videon e Ramës, deputetja Sara Mila zbulon çfarë fshihet pas simbolikës

Deputetja e Partisë Socialiste, Sara Mila, ka komentuar videon e publikuar sot në rrjetet sociale nga kryeministri Edi Rama, ku shfaqet simboli i luanit. E pyetur nëse ky simbol mund të lidhet me zhvillimet e fundit politike, Mila tha se provokimi përmes statuseve dhe reagimeve publike është pjesë e stilit të komunikimit të kryeministrit.

“Është brenda natyrës të profilit të komunikimit publik të kryeministrit. Nuk mendoj se është një video që mund të mund të bëjë shumë lajm në sensin që ç’ ne dhe pse sepse ju e dini se kryeministri Rama shpesh herë provokon me të tilla statuse apo reagime”, u shpreh Mila në ”Euronews Albania”.

Duke iu referuar mundësisë së një lidhjeje mes videos dhe zhvillimeve politike të mbrëmjes së kaluar, deputetja socialiste theksoi se rezultati i votimit tregon një tjetër tablo, ku mbizotëroi uniteti i forcës politike.

“Nuk mendoj që domosdoshmërisht ka qenë e lidhur me të mbrëmshmen. Sa do ta thoja nëse do të kishte një lidhje kronologjike mendoj që do të ishim jo në një unitet 85 vota pro dhe konkretisht votat e PS kanë qenë të gjitha pro reformës administrative-territoriale çka tregoi dhe njëherë që trëndafili triumfoi mbi mbiemrat e përvetshëm edhe ndoshta mbi egot personale”, tha Mila.