74 ditë protestë, i riu: Çdo ditë një i ri mbush valixhen dhe ikën

“Revolucion!” ishte thirrja me të cilën një i ri e mbylli fjalën e tij gjatë protestës përpara Kryeministrisë, duke ngritur shqetësimin për emigrimin masiv të të rinjve dhe pasojat që ai po lë në shoqërinë shqiptare.

Në fjalën e tij, ai solli në vëmendje dramën e familjeve shqiptare që përballen çdo ditë me largimin e fëmijëve. “Çdo ditë një i ri mbush valixhen dhe ikën”, u shpreh ai, duke theksuar se dhimbja më e madhe nuk është vetëm largimi nga vendi, por boshllëku që mbetet pas tij.

Sipas të riut, emigrimi po prek jo vetëm familjet, por edhe të ardhmen e komuniteteve. Fshatra të tëra po mbeten pa të rinj, ndërsa largimi i brezit të ri po kthehet në një nga problemet më serioze të Shqipërisë.

Ai theksoi se të rinjtë nuk kërkojnë privilegje, por mundësi dhe kushte për të ndërtuar një jetë me dinjitet në vendin e tyre. “Ne nuk kërkojmë privilegje, por një Shqipëri ku nuk duhet të largohesh, por ku do të kesh dinjitet. Rinia kërkon që të ardhmen ta ketë këtu”, deklaroi ai.

Në fund të fjalës, mesazhi i tij ishte i drejtpërdrejtë: ndryshim për një Shqipëri ku të rinjtë të mos e shohin emigrimin si të vetmen rrugë për një të ardhme më të mirë.