Acarohet ish-prokurori: Si mundet që kryebashkiaku i Tiranës të jetë në burg

Pas vendimit të Gjykatës së Lartë për të mos pranuar rekursin e mbrojtjes së kryebashkiakut të Tiranës, Erion Veliaj, ka reaguar ish-prokurori Eugen Beci. Ai e konsideroi situatën paradoksale, duke theksuar se është e pazakontë që një funksionar i lartë shtetëror të vijojë të mbajë detyrën ndërkohë që ndodhet në arrest me burg.

”Zoti Veliaj bëri kërkesë në Gjykatën Kushtetuese dhe Gjykata Kushtetuese konstatoi pjesërisht të drejtë pretendimet e zotit Veliaj, përsa i përket dy elementëve kryesorë, që kanë të bëjnë me prezumimin e pafajësisë duke e lidhur atë me faktin që arsyetimi i rrëzimit të këtij pretendimi nga gjykata e lartë nuk ishte i mjaftueshëm dhe pika e dytë që kishte lidhje me arsyetimin e vendimit për sa i përket mënyrës së proporcionalitetit të caktimit të një mase sigurimi për një kryetar bashkie që është në detyrë dhe ndërkohë që është në arrest në burg.

Këto janë elementë të çuditshëm, paradoksal, por i bëjnë mirë publikut, i bëjnë mirë masave të sigurimit të popullit, sepse caktohen disa kushte dhe kritere, të cilat duhet të ngrenë stekën për të thënë që masa e sigurimit arrest në burg është masë përjashtimore, jo masë e zakonshme, por janë paradoksale për faktin e thjeshtë që kryetari i bashkisë së kryeqytetit është i pandehur, është në burg, është dhe në detyrë”,-tha në A2 CNN.