Procesi për zgjedhjen e Prokurorit të ri të Përgjithshëm ka hyrë tashmë në fazën e kandidaturave zyrtare. Është një moment i rëndësishëm për sistemin e drejtësisë, pasi drejtuesi i këtij institucioni do të ketë përballë sfida të shumta në koordinimin e politikës penale, rritjen e eficiencës së prokurorive në vend dhe përfaqësimin institucional të organit të akuzës.
Mes emrave të paraqitur, sipas vlerësimit tim, spikat kandidatura e prokurorit të SPAK-ut, Adnan Xholi. Nuk është vetëm çështje profili profesional, por edhe simbolike. Për herë të parë, nëse Këshilli i Lartë i Prokurorisë do të zgjidhte dy kanditura, por të listonte të parin me pikë, pikërisht një prokuror që vjen nga struktura e posaçme kundër korrupsionit dhe krimit të organizuar, do të përcillej një mesazh i qartë se përvoja e fituar në hetimin e dosjeve më të ndërlikuara vlerësohet edhe në drejtimin e institucionit më të lartë të akuzës.
Natyrisht, kandidatët e tjerë meritojnë respekt dhe vlerësim për karrierën e tyre. Megjithatë, zgjedhja nuk duhet të shihet vetëm si konkurrim biografish, por si një vendim që përcakton orientimin e Prokurorisë së Përgjithshme për vitet e ardhshme.
Reforma në drejtësi e vitit 2016 ndryshoi rrënjësisht arkitekturën e sistemit të prokurorisë. Kompetenca të rëndësishme iu kaluan SPAK-ut, ndërsa Prokuroria e Përgjithshme mbeti kryesisht me funksione koordinuese, administrative dhe përfaqësuese. Kjo ka bërë që, në perceptimin publik, pesha institucionale e Prokurorit të Përgjithshëm të mos jetë më ajo që ishte para reformës.
Pikërisht për këtë arsye, drejtuesi i ardhshëm duhet të ketë jo vetëm integritet dhe aftësi profesionale, por edhe vizion për të forcuar rolin kushtetues të Prokurorisë së Përgjithshme. Në një kohë kur në Komisionin Parlamentar për reformën në drejtësi po diskutohen ndryshime dhe rishikime të kuadrit ligjor, një Prokuror i Përgjithshëm me eksperiencë të drejtpërdrejtë në SPAK mund të japë një kontribut të rëndësishëm në debatet për balancimin e kompetencave ndërmjet institucioneve të prokurorisë.
Nëse zgjidhet Adnan Xholi do të kishte mundësinë të sillte një frymë të re menaxheriale dhe profesionale në Prokurorinë e Përgjithshme, duke forcuar bashkëpunimin me prokuroritë e juridiksionit të përgjithshëm dhe duke kontribuar në rritjen e besimit të publikut te organi i akuzës.
Në fund, vendimi i Këshillit të Lartë të Prokurorisë duhet të mbështetet mbi meritën, integritetin dhe vizionin institucional. Ndaj publiku pret që Xholin ta listojë të parin, pasi KLP bën vetëm procesin dhe dërgon maksimumi 3 kandidatura në Parlament. Me pas është Parlamenti që voton njerën prej tyre! Nëse njera nga kandidarurat nuk bën dot 84 vota atehere mbetet i pari në listen e KLP. Në fakt parlamenti do t’i bënte nder vetes nëse mazhorancë dhe opozitë e votojnë emrin e Adnan Xholit.
Nga këndvështrimi im, kandidatura e Adnan Xholit përmbush këto elemente dhe do të përfaqësonte një zgjedhje që do t’i jepte një profil të ri dhe një kredibilitet më të madh Prokurorisë së Përgjithshme në një fazë të rëndësishme të reformimit të sistemit të drejtësisë. Nuk duhet harruar se Olsian Çela, që i mbaron mandati, ka bërë një punë vetmohuese për të ruajtur imazhin e mirë të Prokurorisë.
S.P