Aksident në aksin Gostivar-Kërçovë, 29-vjeçari shqiptar humb kontrollin e motorit dhe plagoset rëndë

Një 29-vjeçar shqiptar ka mbetur i plagosur rëndë pas një aksidenti me motor në aksin rrugor Gostivar-Kërçovë, në Maqedoninë e Veriut.

Ngjarja ka ndodhur mëngjesin e 9 gushtit, rreth orës 08:10. Policia e Gostivarit është njoftuar nga Qendra e Urgjencës pasi i riu është dërguar për ndihmë mjekësore me dëmtime të rënda trupore.

Sipas informacioneve paraprake të autoriteteve, 29-vjeçari me inicialet O.Q., i cili qëndron përkohësisht në fshatin Mavrovë, ishte duke udhëtuar me një motoçikletë tip “Yamaha”, me targa të Gostivarit.

Aksidenti ka ndodhur pranë një guroreje, ku dyshohet se i riu ka humbur kontrollin mbi drejtimin e motorit dhe është rrëzuar në rrugë.

Pas marrjes së njoftimit, në vendngjarje kanë shkuar shërbimet policore, të cilat kanë kryer këqyrjen e zonës dhe kanë mbledhur të dhënat e para për dinamikën e aksidentit.

Ndërkohë, autoritetet vijojnë hetimet për të përcaktuar shkaqet dhe rrethanat e plota në të cilat ndodhi aksidenti.