Atentat me armë biznesmenit, i plagosur shkon vetë në spital

Aktualitet E Shtunë, 8 Maj 2021 14:24

Atentat ndaj një biznesmeni në Shkodër. Syrri Mehmetaj, 44 vjeç, është qëlluar me armë zjarri në hyrje të qytetit ndërsa lëvizte me automjetin e tij tip “Benz” me targë AA 031 NL.

I plagosuri ka mbërritur vetë në spitalin e Shkodrës, ku më pas është njoftuar dhe policia.

“Më datë 26.12.2016 rreth orës 11.50 njoftohemi se në spitalin rajonal Shkodër është dërguar një person i plagosur.Menjëherë kanë shkuar shërbimet e Policisë Shkodër të cilët konstatuan se ka mbetur i plagosur me armë zjarri shtetasi S.M. 44 vjeç, banues në Shkodër, i cili ndodhet në gjëndje të rëndë shëndetsore”.

Mësohet se 44-vjeçari ndodhet në gjendje të rëndë për jetën.

Policia thotë se në territorin e spitalit është gjetur dhe sekuestruar autovetura tip “Benz” me targë AA 031 NL, e dyshuar si e goditur me armë zjarri.

Nga ana e bluve janë ngritur pika kontrolli si dhe po bëhet krehja e zonës me qëllim kapjen e autorëve të dyshuar dhe vendosjen para përgjegjësisë penale.

Grupi hetimor po vazhdon veprimet hetimore për zbardhjen e plotë të kësaj ngjarje./Ora News