Avancimi i reformave për kapitullin e mjedisit, Jaupaj e Dhuka takim me ministrin gjerman

Ministri i Mjedisit, Sofjan Jaupaj, së bashku me ministren e Shtetit dhe Kryenegociatoren, Majlinda Dhuka zhvilluan një takim me ministrin Federal të Gjermanisë për Mjedisin, Carsten Schneider.

Gjatë takimit u prezantua avancimi i Shqipërisë në negociatat me Bashkimin Evropian me fokus të veçantë në Kapitullin 27-Mjedisi dhe Ndryshimet Klimatike, një nga kapitujt më sfidues dhe kyç për procesin e integrimit, i drejtuar nga Ministria e Mjedisit. Ministri gjerman shprehu mbështetjen e plotë të Gjermanisë për rrugën evropiane të Shqipërisë duke konfirmuar edhe një herë partneritetin e fortë në avancimin e reformave dhe arritjen e standardeve të BE-së.

Politika e mjedisit e BE-së synon të promovojë zhvillimin e qëndrueshëm dhe të mbrojë mjedisin për gjeneratat e tanishme dhe të ardhshme. Ajo bazohet në masat parandaluese, në parimin “ndotësi paguan”, duke luftuar dëmtimin e mjedisit në burim, në përgjegjësinë e përbashkët dhe integrimin e mbrojtjes së mjedisit në politikat e tjera të BE-së.

Acquis përfshin mbi 200 akte kryesore ligjore që mbulojnë legjislacionin horizontal, cilësinë e ujit dhe ajrit, menaxhimin e mbetjeve, mbrojtjen e natyrës, kontrollin e ndotjes industriale dhe menaxhimin e rreziqeve, kimikatet dhe organizmat e modifikuar gjenetikisht (OMGJ), zhurmën dhe pylltarinë.