Së shpejti do të kemi paqe midis Izraelit dhe Iranit, shkroi presidenti amerikan, Donald Trump në rrjetin e tij Truth Social.
“Irani dhe Izraeli duhet të arrijnë një marrëveshje, dhe ata do ta bëjnë, ashtu siç bënë India dhe Pakistani”, shtoi Trump, duke folur për një seri telefonatash dhe takimesh.
“Unë bëj shumë gjëra dhe nuk marr kurrë asnjë mirënjohje, por nuk ka problem”, theksoi Trump.
Irani sapo lëshoi një tjetër breshëri raketash drejt objektivave në Izrael, sipas raportimeve të agjencisë iraniane të lajmeve Fars.
Alarme për raketa janë lëshuar përsëri në Tel Aviv dhe vende të tjera në Izraelin qendror, ndërsa sirenat kanë rënë në veri të vendit.
Ndërkohë, Ministria e Sigurisë Kombëtare e Izraelit lëshoi udhëzime për njerëzit në të gjithë vendin, duke u thënë njerëzve të qëndrojnë pranë strehimoreve dhe bunkerëve.
”Çdo lëvizje në hapësirat publike duhet të mbahet në minimum dhe tubimet publike duhet të shmangen, sipas një zëdhënësi ushtarak. Këto urdhra do të mbeten në fuqi derisa të publikohet një përditësim”, thanë zyrtarët.
Sulmi i ripërtërirë iranian vjen pasi disa persona u vranë tashmë në sulmet me raketa iraniane gjatë natës.