Farapjekësit e Belshit dhe trotuari i Shtërmenit

Nga Besim Dybeli

Bukuri e përçudnuar në Belshin turistik. Mbi mermerë të bardhë , lulishte plot hijeshi e shatërvanë plot freski, si miliongonat e dheut janë shpërndarë lëvoret e farave të pjekura! Ky është paradoksi më i madh në këtë komunitet, që projektet qeveritare kanë si për “destinacion” qytetarinë.

Kisha qëndruar më parë. Vajta sërisht. Për një kafe a akullore familjare. U kënaqa nga ajo ç’ka përfunduar. Liqeni ka dalë sheshit brinjë sheshit që nuk “rënkon” më nga kioska e lokale mejhanexhinsh me erë gjithëllojë. Pamja fantastike, sidomos natën mes dritash llamburitëse.

Keqardhje, teksa shesh ketë Rilindje Urbane , mbushur me mori farash, hedhur për tokë. Nëse ende mungon qytetaria dhe edukata, po policia bashkiake, ka ndonjë detyrim moralo-qytetar a ligjor?! U ktheva mes kënaqësisë dhe zhgënjimit …

Përgjatë bulevardit të ri mespërmes Shtërmenit , ( pjesë e bashkisë Cërrik) , një tjetër përjetim. Rruga e re e asfaltuar, që të çon drejt hidrocentralit të Banjës e në qendër të Gramshit , me trotuare e neone në Shtërmen. Nëse do isha në këmbë , zor se do ecja mbi trotuar. Mbi pllakat dyngjyrëshe , jashtëqitjet e kafshëve kishin mbuluar krejtësisht trotuarin. Normalisht që mbi të kalojnë për në ara kafshët shtëpiakie. Po , edhe sikur të përpiqeshe t’i tufëzoje bashkë për jashtëqitje kolektive mbi trotuar, zor se do t’ja arrije!

Sa pak edukatë dhe kulturë urbane përcjellim ne shqiptarët ???!!!