Një pallat është përfshirë nga flakët pasditen e kësaj të marte në Tiranë, përballë spitalit ”Nënë Tereza”. Zjarri ra fillimisht në katin e fundit të një pallati tek kompleksi ”Arlis”, por që më pas flakët u përhapën me shpejtësi në të gjithë ndërtesën. Raportohet se ka shkuar në 11 numri i të lënduarve. Zjarri ka marrë përmasa të mëdha dhe po përhapet me shpejtësi, duke vështirësuar punën e zjarrfikësve. Në aksionin për shuarjen e flakëve kanë marrë pjesë 8 zjarrëfikëse, autoambulanca, 2 helikopterë Cougar dhe 50 persona, zjarrëfikës, ushtarë, forca të Policisë dhe RENEA-s. Ndërkohë që raportohet se në terren ka zbarkuar edhe ministri i Brendshëm, Besfort Lamallari për të vëzhguar nga afër situatën.
Drejtori i Urgjencës Kombëtare, Skënder Brataj informon se ka shkuar në 11 numri i të lënduarve nga zjarri që përpiu pallatin e komplektit “Arlis” në zonën e “Farmacisë 10” në Tiranë. Brataj veçoi një paciente, e cila ka pësuar djegie 15%, por e cila famirësisht është jashtë rrezikut për jetën. ”I vetmi person i shtruar për djegie plastike është një grua, me djegie 15%, jashtë rrezikut për jetën. Pesë persona janë shtruar te toksikologjia. Ka edhe nga zjarrfikësit, por nuk e di numrin e saktë për momentin që t’jua them”,- tha Brataj.
Drejtori i Përgjithshëm i Policisë, Skënder Hita tha se ende nuk janë kontrolluar të gjitha apartamentet, për të bërë një vlerësim të plotë të dëmeve të shkaktuara nga zjarri. ”Kanë qenë dy banorë të evakuar nga shërbimet zjarrëfikëse dhe nga shërbimet e Policisë që në momentin e parë. Nuk kanë probleme shëndetësore të rënda përveç asfiksisë. Nuk kemi bërë bilancin përfundimtar të pasojave.
Pas fikjes së zjarrit, do ju bëjmë me dije bilancin përfundimtar të dëmeve. Janë paraqitur në QSUT punonjës të shërbimit zjarrëfikës. Ata janë mirë me shëndet dhe nuk kanë probleme të rënda. Janë vënë në dispozicion repartet e FNSH-së, repartet speciale RENEA për hapjen e dyerve, që të mos kishim humbje jete. Akoma nuk janë kontrolluar të gjitha apartamentet. Po grumbullojmë gjithë provat e nevojshme. Do marrim gjithë kamerat e sigurisë dhe do kryejmë gjithë procedurat hetimore. Dhe nëse zjarri ka ardhur nga persona të jashtëm, patjetër që do ketë edhe masa ekstreme”.
Ministria e Mbrojtjes ka dalë me një njoftim ku nënvizohet se në vijim të situatës së krijuar nga zjarri në një kompleks banimi në kryeqytet, janë angazhuar dhjetëra mjete zjarrfikëse dhe personel në terren. ”Fatmirësisht, nuk raportohen persona të lënduar si pasojë e zjarrit. Bashkia Tiranë ka operuar me kapacitete të plota, si në mjete ashtu edhe në personel. Në ndihmë janë bashkuar edhe Bashkia Kamëz me dy mjete zjarrfikëse dhe 10 efektivë, si dhe Bashkia Vorë me dy mjete dhe 10 efektivë. Gjithashtu, Forcat e Armatosura janë angazhuar me katër mjete zjarrfikëse, 26 efektivë dhe një helikopter Cougar. UKT ka mbështetur operacionin me tre autobote uji”, lexohet më tej në njoftim.
Kjo është hera e dytë që bie zjarr në këtë pallat. Një ngjarje e ngjashme, por jo në këto përmasa, ka ndodhur në vitin 2021, ku gjatë punimeve në pallat ka marrë flakë fasada e ventiluar. Ky lloj ndërtimi në fasadë, me material poliretan në formë shkume, e njohur ndryshe fasadë e ventiluar, ka qenë shkak i zjarrit vite më parë edhe në një pallat në zonën e ish-Parkut të Autobusëve.
Digjet pallati pranë QSUT, Ministria e Mbrojtjes jep të dhënat e para
Flakët tek pallati në kompleksin ”Arlis”, ndërhyn edhe helikopteri i ushtrisë
E moshuara mbeti në banesë, zjarrfikësit ndërhyjnë në kohë dhe e evakuojnë
