Gjergj Luca me korçarët në kantierin e anijeve të Selanikut, ku puna flet më shumë se fjalët

Sipërmarrësi i njohur shqiptar, Gjergj Luca, një figurë e shquar në fushën e biznesit dhe inovacionit në industrinë e peshkimit, ka ndarë së fundmi momente frymëzuese nga kantieri detar i Selanikut, ku prej vitesh punojnë dhjetëra shqiptarë, kryesisht nga qyteti i Korçës. Ky kantier është një nga qendrat më të rëndësishme në rajon për ndërtimin dhe rehabilitimin e anijeve të peshkimit, duke u bërë një pikë strategjike për zhvillimin e këtij sektori.

Në postimin e tij në rrjetet sociale, Luca theksoi rëndësinë e punës së palodhur dhe vlerat e një etike që vihet mbi fjalët boshe. Ai vlerësoi kontributin e bashkatdhetarëve të tij, të cilët me përkushtim dhe mjeshtëri janë bërë një pjesë e rëndësishme e këtij kantieri të fuqishëm.

“Nga Korça në Selanik, ne tregojmë se puna flet më shumë se fjalët! Shqiptarët e vërtetë nuk presin, por veprojnë. Le ta bëjmë këtë mentalitet edhe në Shqipëri: Më pak fjalë, më shumë punë!”, – shkruan ai në postimin e tij.

Kjo deklaratë e tij nuk është thjesht një mesazh motivues, por një filozofi pune që Luca e ka aplikuar ndër vite në sipërmarrjet e tij, veçanërisht në kompaninë lider “Rozafa”, e cila ka revolucionarizuar industrinë shqiptare të peshkimit dhe përpunimit të produkteve të detit.

Ndërkohë, kantieri i Selanikut mbetet një dëshmi e gjallë e aftësisë së shqiptarëve për t’u integruar dhe për të dhënë kontributin e tyre në sektorët më kërkues të ekonomisë, duke treguar se puna dhe profesionalizmi nuk kanë kufij.

Ky mesazh shkon përtej kufijve të Greqisë e Shqipërisë; ai është një thirrje për një ndryshim të mentalitetit, për të vënë theksin te veprimi dhe rezultatet konkrete, në vend të fjalëve dhe premtimeve boshe.
Albert Vataj