Gjykata le në burg nipin e Enver Hoxhës

Gjykata e Krimeve të Rënda vendosi masën e sigurisë “arrest me burg” për nipin e ish-diktatorit Hoxha, Ermal Hoxha, shtetasin Ilir Hyseni dhe dy kolumbianët Cesar Avila dhe Wather Moreno, të akuzuar për trafik ndërkombëtar lëndësh narkotike.  Gjyqtarja e çështjes, Liljana Baku, pasi dëgjoi interesin e palëve dhe kërkesën e Prokurorit, Olsian Çela, vendosi të pranojë kërkesën e hetuesisë, pra “arrest me burg” për katër të pandehurit.

Prokuroria për Krime të Rënda dorëzoi një ditë më parë në gjykatë kërkesat për caktimin e masës së sigurisë për 9 të arrestuarit për trafik ndërkombëtar lëndësh narkotike, të arrestuar gjatë aksionit në laboratorin e kokainës, në Xibrakë të Elbasanit. Organi i akuzës ka kërkuar për të gjithë të pandehurit masën e sigurisë “arrest me burg”.

Gjatë ditës së dielë do të jepet masa e sigurisë për pjesën tjetër të të arrestuarve në operacionin “Xibraku”: Saimir Batku, 43 vjeç, Kastriot Imeri 47 vjeç, Gentjan Gjonaj 43 vjeç, Arjan Dalipi 50 vjeç dhe Kelment Dalipi 45 vjeç.