Habit avokati i Ermal Hoxhës: I ka shoqëruar kolumbianët si taksist (VIDEO)

Pas caktimit të masë së sigurisë ndaj nipit të Enver Hoxhës, ka folur avokati i tij, Asaf Hadëraj.

Deklaratat e tij kanë qenë të habitshme, teksa ka thënë se Ermali ka qenë taksist i dy kolumbianëve.

Jo vetëm kaq, por sipas tij, Ermal Hoxha është një njeri i papunë, pa shtëpi dhe që jeton me qera.

“Po është e vërtetë, çdo njëri nga ne mund të shoqërohet me çdo person që hyn e del në Shqipëri për interesat e tij ekonomike. Ai i ka shoqëruar kolumbianët si taksist.

Si Ermal Hoxha ka lëvizur me Ferrari nëpër Shqipëri e Tiranë, kur ai s’ka makinë të tijën, është i papunë është pa shtëpi dhe jeton me qera?

I ka transportuar me makinën e vëllait të tij dhe kjo makinë është sekuestruar. Qëndrimi i klientit tim është ky, se s’ka pranuar akuzën”, u shpreh Haderaj.

Ai thotë se ndaj Ermal Hoxhës nuk ka asnjë provë. Hadëraj tha se do të kërkojë nga shkallët e tjera të gjykatave, lirimin e tij. “Ne kërkuam në Gjykatë që arrestimi i kryer në drejtim të klientit që përfaqësoj të konsiderohet i paligjshëm për faktin se në adresë të tij nuk ka asnjë provë konkrete që të ligjësojë arrestimin e tij dhe akuzën. Unë kërkova që masa e sigurisë “arrest me burg” të ndërrohet, duke u vendosur detyrim paraqitje.

Do të ndjekim shkallët e drejtësisë për të provuar të drejtat tona ligjore”, tha ai pas caktimit të masës së sigurisë për Ermal Hoxhën.