Helikopteri me drogë, 2 ushtarakë të dyshuar si bashkëpunëtorë të Fekës
Rrëzimi i helikopterit me drogë në Spanjë, që solli për pasojë edhe vdekjen e pilotit të FA, Major Sokol Feka, ka çuar në arrestimin e dy ushtarakëve, si të dyshuar për lidhjet e tyre me Majorin e përfshirë në ngjarjen e ndodhur.
Lajmin e ka bërë të ditur Ministria e Mbrojtjes, e cila përmes një deklarate thekson se Forcat e Armatosura të Republikës së Shqipërisë prej mëse një viti kanë nisur një proces gjithëpërfshirës e të vijueshëm për forcimin e disiplinës dhe rregullit ushtarak brenda strukturave të tyre.
Ngjarja e ndodhur me Major Sokol Feka, përbën një shtysë në kryerjen më me cilësi të këtij procesi.
Në këtë kuadër, për thyerje të rëndë të disiplinës, Policia Ushtarake ka bërë ndalimin e dy ushtarakëve, një Major dhe një Kapiten, si të dyshuar për lidhjet e tyre me Majorin e përfshirë në ngjarjen e ndodhur.
Për të hedhur dritë të plotë mbi dyshimet e ngritura, Policia Ushtarake po bën kallëzimin në Prokurorinë e Krimeve të Rënda.
Ministria e Mbrojtjes dhe Shtabi i Përgjithshëm i FA shprehin ven dosmërinë për të vijuar më tej thellimin e masave për forcimin e disiplinës në interes të kryerjes me sukses të misionit të tyre dhe ruajtjes së dinjitetit të figurës së ushtarakut.