Historia e Linditës/Burri e flak jashtë, 53 vjeçari: Ajo bridhte nga Babrruja

Specialistët për Krimet në Komisariatin e Policisë Shijak kanë arrestuar një tjetër burrë që akuzohet për dhunë në familje. Në pranga ra Lik Dedaj 53 vjeç, banues në Xhafzotaj, Shijak, i dënuar më parë për veprat penale “Dhunë në familje” dhe “Armëmbajtje pa leje”. Ai akuzohet se në banesë, për motive të dobëta, ka ushtruar dhunë fizike ndaj bashkëshortes së tij, shtetases L.D. 37 vjeçe.

Por kjo nuk është hera e parë dhe e vetme që Dedaj dhunon bashkëshorten e tij. Historia e këtij çifti është bërë publike 3 javë më parë në media.

Në studion e emisionit “Me Zemër të Hapur”, nëna e tre fëmijëve ka rrëfyer më 30 qershor të këtij viti historinë e saj dramatike, nga lidhja me një burrë të martuar, bashkëjetesën e saj në një shtëpi me gruan e tij dhe deri tek urdhrat e mbrojtjes për shkak të dhunës.

“Me burrin e parë u ndava ashtu kot. Më nxori jashtë prej flokësh. Ishte martesë me mblesëri. Burrin e dytë e njoha vetë. U njohëm përmes nuses së dajës time. Më dha numrin e telefonit por e dija që ishte i martuar. E dija që kishte djale edhe pse ishte i martuar rashë në dashuri. E mora se mu vardis por ai nuk u divorcua, por ne jetuam të dyja gratë në një shtëpi. Kam jetuar gati 6 vite me nusen e tij dhe me djalin. Ajo jetonte vetëm në një dhomë më djalin. Unë me burrin, ku hanim dhe pinim bashkë. Kur ikëm në Greqi, unë rashë në burg se unë isha pa dokumente. Por vetëm para një viti bëra celebrimet se ngaqë ishte i martuar me atë tjetrën. Pasi dhe unë isha e martuar ende dhe nuk e kisha bërë celebrimin me burrin e parë. Më dhunonte, kam dhe urdhra mbrojtjeje. Të fundit e kam në datën 27”, tha Lindita.

Lindita u përball me bashkëshortin e saj, ku ai mohoi kategorikisht akuzat e saj ndaj tij. Lik Dedaj në një lidhje telefonike pohoi se nuk e kishte dhunuar më gruan, ndërsa e shkuara për të ishte mbyllur.

“Unë e di se kam një grua, me dy fëmijë. Jo dy gra. Madje i kam sjell dhe lekë në shtëpi, se jam në Itali. Ajo më mori lekët dhe iku nga shtëpia. Unë kam qenë i divorcuar para 6 vitesh. Vjet jemi martuar me dokumente, në dhjetor, se ka qenë e martuar. S’e kam dhunuar tani, jam në Itali. Ato që ikën, ikën. Gruan e dua tek shtëpia, atje e kam lënë. Ajo mori lekët dhe bridhte nga Babrruja. Ça donte andej ajo? Del në internet, bën foto. Nëse unë jam fajtor ndaj asaj femre nuk pranon dënim, por varje. Nuk e kam dhunuar, ajo është larguar nga shtëpia. Ajo luan rrugëve”, tha bashkëshorti i Linditës, i cili aktualisht është emigrant në Itali.