Ikën nga grupi i PS-së? Erion Braçe shuan zërat: Do t’i rri përballë partisë sime për të vërteta që refuzon t’i shohë

Deputeti i PS-së, Erion Braçe thotë se nuk ka ndërmend të largohet nga grupi parlamentar i PS-së, të bëhet i pavarur apo të dorëhiqet nga mandati i tij. Ky sqarim vjen në një moment pas zërave që emri i tij është përfolur sikurse do të largohet nga grupi i PS-së, siç bëre deputetja Marjana Koçeku.

Në një reagim të gjatë në Facebook, Braçe theksoi se ai mbetet socialist dhe pjesë e PS-së prej dekadash, duke nënvizuar se ka qenë aktiv në parti për rreth 35 vite dhe se do të vazhdojë të ushtrojë detyrën e deputetit në Tiranë.

Për më tepër, Braçe shton se do të vijojë të jetë kritik brenda radhëve të PS-së, duke kërkuar llogaridhënie, duke debatuar dhe duke kundërshtuar kur e sheh të nevojshme, por gjithmonë “nga brenda partisë” dhe jo përmes distancimit politik.

Deklarata e plotë 

Fjala ime

Përgjigje për tre gjëra:

Unë jam socialist, nuk bëhem i pavarur,

Jam partizan, jo neutral, mbaj qëndrime,

Nuk dal mënjanë!

Unë jam deputet i zgjedhur në tiranë, nuk jam prej listës, kam bërë deputetin, bëj deputetin, Do vijoj të bëj deputetin, nuk dorëhiqem! Do vijoj t’i rri përballë partisë sime, duke thënë të vërtetën, duke kërkuar llogari, kritikuar, debatuar, kundërshtuar, propozuar, miratuar aty, sy më sy e nga çdo cep i territorit që mbuloj si deputet; pra nuk kam nevojë për protestën e nuk dua kapital politik prej saj!

Askush nuk do ta besonte që po të ikja nga grupi i PS-së, do isha i pavarur, edhe ata që ma shkruajnë këtë; unë jam në PS prej themelimit, kam milituar në të për 35 vite, kam jetuar në të e punuar bashkë me të, kam bërë beteja aty e prej aty, si socialist, duke mbajtur qëndrime e pa qenë kurrë neutral, domethënë i pavarur.

Ndërkohë kam bërë deputetin, bëj deputetin e do vijoj të bëj deputetin, jo vetëm në Njësinë 5, por në të gjithë Tiranën. Nuk ka sot njeri në njësinë time që s’e di kë ka deputet. Nuk ka sot njeri në Tiranë që të mos dijë që unë jam deputet i këtij qarku. Nuk gjen njeri të thotë që deputeti nuk më ka ardhur në njësi, lagje, bllok, rrugë, rrugicë, shesh poshtë pallatit; që të thotë deputeti nuk më është përgjigjur, nuk më ka përfaqësuar në Kuvend për hallet e shqetësimet e mia apo të lagjes. Pra kam bërë punën, bëj punën, do bëj punën, nuk dorëhiqem e do respektoj 25 mijë njerëzit që votuan e më besuan këtë punë.

Në fund, doemos që do vijoj t’i rri përballë partisë sime për të vërteta që refuzon t’i shohë apo i ka jashtë çdo agjende për 1001 arsye, përfshi shpërfilljen, përjashtimin apo arrogancën; kam hapësirën e mjaftueshme për ta bërë këtë pa asnjë rezervë, siç të shtunën, sy më sy me kryeministrin e qeverinë. Pra nuk kam nevojë të jem në protestën me 7-8 agjenda – disa primitive e shumë të rrezikshme për këtë vend, por e bëj përballë e sy më sy, duke qenë i përgjegjshëm, duke marrë e kërkuar përgjegjësi!