Zëvendëskryeministrja Albana Koçiu u shpreh sot se mbi 1 700 biznese kanë shprehur interes për programin “Dyfisho Sipërmarrjen Tënde”, ndërsa 800 prej tyre janë në proces trajtimi.
Përmes një videomesazhi, zv.kryeministrja paraqiti ecurinë e programit i cili u krijon ndërmarrjeve të vogla dhe të mesme mundësi financimi për të zgjeruar aktivitetin, për të blerë pajisje dhe për të rritur kapacitetet prodhuese.
“Vetëm në dhjetë ditët e para nga lançimi i platformës, nëpërmjet portalit e-Albania janë regjistruar 241 aplikime. Aktualisht, 222 raste po shqyrtohen nga bankat e nivelit të dytë dhe 20 biznese kanë marrë miratimin për financim me kredi.
Shumë biznese kanë idetë dhe vullnetin për të bërë hapin tjetër, por përballen me vështirësi në sigurimin e financimit. Përmes këtij programi duam t’u japim mundësinë të investojnë, të rriten dhe të krijojnë vende të reja pune”, tha Koçiu.
Po ashtu, Koçiu bëri të ditur se për programin është vënë në dispozicion një linjë financimi prej 250 milionë eurosh, me mundësi zgjerimi deri në 1 miliard euro.