Kryeministri Edi Rama ka bërë të ditur se fushat profesionale të padelit, të cilat mirëpritën në Tiranë një nga turnetë më prestigjiozë në botë, janë tashmë pjesë e kompleksit të ri sportiv të Federatës Shqiptare të Padelit në Lundër.
Përmes një postimi në rrjetet sociale, Rama e cilësoi kompleksin si një investim me infrastrukturë moderne, që do t’u shërbejë sportistëve, të rinjve dhe zhvillimit të padelit në Shqipëri. Sipas kreut të qeverisë, ky kompleks krijon kushte bashkëkohore për stërvitje dhe aktivitete sportive, duke synuar të nxisë rritjen e interesit për padelin dhe të mbështesë zgjerimin e këtij sporti në vend.
”Kompleksi i ri Sportiv i Federatës Shqiptare të Padelit. Fushat profesionale të padelit që mirëpritën në Tiranë një nga turnetë më prestigjiozë në botë, janë tashmë pjesë e kompleksit të ri sportiv në Lundër, një investim me një infrastrukturë moderne që do t’u shërbejë sportistëve, të rinjve dhe zhvillimit të këtij sporti në Shqipëri”,-shkruan Rama.
