Konflikti me armë, Policia reagon pas pretendimeve të biznesmenit Vasil Beniaj: Po hetojmë ngjarjen

Policia e Vlorës ka reaguar lidhur me ngjarjen e ndodhur në një resort në qytetin bregdetar, pas deklaratave të biznesmenit Vasil Bedinaj. Në njoftimin paraprak, uniformat blu nuk konfirmojnë pretendimet e Bedinajt sa i përket rrethanave dhe dinamikës së ngjarjes. Megjithatë, Policia konfirmon se në resort ka pasur një konflikt dhe se ka qenë vetë pronari i biznesit ai që ka kërkuar ndërhyrjen e forcave të rendit. Sipas njoftimit zyrtar, rreth orës 11:30, pronari i resortit ka telefonuar Policinë, duke deklaruar se disa persona të armatosur po konfliktoheshin me të. Forcat e Policisë kanë shkuar në vendngjarje, ndërsa vijojnë verifikimet për të sqaruar rrethanat dhe dinamikën e plotë të incidentit.

Njoftimi i policisë:

Vlorë/Informacion paraprak

Rreth orës 11:30, pronari i një resorti në Vlorë ka njoftuar Policinë se persona të armatosur po konfliktoheshin me të.

Menjëherë pas njoftimit, shërbimet e Policisë kanë shkuar në drejtim të adresës së dhënë, si dhe kanë ngritur pika kontrolli.

Shërbimet e Policisë, në afërsi të Pusit të Mezinit, kanë konstatuar një automjet që lëvizte me shpejtësi dhe janë vënë në ndjekje të tij.

Drejtuesi i këtij automjeti ka humbur kontrollin dhe është aksidentuar. Në automjet janë konstatuar 3 shtetas, 2 prej të cilëve janë dëmtuar si pasojë e aksidentit, ndërsa tjetri nuk ka probleme shëndetësore.

Gjatë kontrollit në automjet, shërbimet e Policisë kanë gjetur 1 armë zjarri, pistoletë.

Është ngritur një grup i posaçëm hetimor, i cili, në drejtimin e Prokurorisë, po punon për zbardhjen e dinamikës së ngjarjes dhe identifikimin e të gjithë shtetasve të përfshirë.

Shërbimet e Policisë së DVP Vlorë, në bashkëpunim me shërbimet e disa DVP-ve të tjera, po kryejnë kontrolle dhe veprime të tjera, me qëllim identifikimin dhe kapjen e shtetasve të tjerë të përfshirë në këtë ngjarje.

Meqenëse veprimet janë dinamike, në përfundim të veprimeve të para hetimore do të ketë një njoftim të plotë për ngjarjen.