Kryebashkiakët socialistë kundër për ndarjen territoriale, Mazniku: Debati në Kuvend, jo me protesta

Kur përfaqësues të zgjedhur të Partisë Socialiste, si kryebashkiakë dhe deputetë, dalin publikisht kundër një reforme të propozuar nga qeveria që ata përfaqësojnë, përballë nuk kemi më një debat të zakonshëm mes pushtetit dhe opozitës. Kjo situatë dëshmon për një përplasje të brendshme politike, ku përplasen interesa, qëndrime dhe ekuilibra brenda vetë mazhorancës.

Ndaj dhe nismëtari i mazhorancës, Arbjan Mazniku, i cili qëndron në krye të Reformës Territoriale që ka propozuar shkrirjen e 15 bashkive, i cilëson kundërshtitë në terren jo si një debat që lindi nga mungesa e transparencës, por si lëvizje për interesa të ngushta personale të disa zyrtarëve që nuk duan të heqin dorë nga karrigia.

Të njëjtën përgjigje ai e ka edhe për kolegun e tij në grupin parlamentar socialist, deputetin e Vlorës, Vullnet Sinaj, i cili kërkon që Selenica të mbetet bashki më vete. Socialistët nuk e pranojnë sfidën e demokratëve që t’i çojnë dy hartat në referendum.

Mazniku e fton Luçiano Boçin që betejën ta kryejnë në të njëjtën rrugë, Parlament. Opozita ka shpresa që ndërkombëtarët do të frenojnë hartën, Mazniku ju shuan edhe këtë dilemë. Vendimin e fundit socialistët ia lënë Parlamentit, institucion ku ata e kanë shumicën e cilësuar, me votat e nevojshme për ta kaluar reformën edhe pa dakordësinë e PD.

Reforma Administrative në rrezik? Kundërshtarët më të fortë po dalin nga vetë Partia Socialiste