Kushi thirrje drejtuesve të zyrave arsimore në 10 bashkitë: Angazhim për mësimin online

Pas vendimit që shkollat e mesme në 10 qytete të vndit do të vijojnë mësimin online për një periudhë dy javore, ministrja e Arsimit, Evis Kushi zhvilloi një takim online me drejtuesit e zyrave vendore arsimore që janë pjesë e zonave me risk të lartë.

”Menjëherë pas sugjerimit të Komitetit Teknik të Ekspertëve për zhvillimin e mësimit online për një periudhë 14 ditore në shkollat e mesme në zonat me risk të lartë, zhvillova një takim online me drejtuesit e zyrave vendore arsimore që preken, si dhe me përfaqësues nga MASR dhe Drejtoria e Përgjithshme e Arsimit Parauniversitar”,-thotë Kushi.

Ministrja thotë se gjatë takimi u ka kërkuar të gjithëve që të shtojnë vëmendjen për monitorimin e vazhdueshëm të zhvillimit të mësimit online, duke siguruar që nxënësit dhe mësuesit po përdorin në mënyrë efektive kanalet alternative për procesin mësimor: atë të platformës Akademi.al, kanalin e dedikuar RTSH Shkollë dhe kanalin në Youtube të MASR.

Nga ana tjetër, ajo ka nënvizuar sesa e rëndësishme është që secili të mos ulë në asnjë moment vigjilencën dhe angazhimin për të monitoruar personalisht e me grupe pune nëpër shkolla rreth zbatimit të masave anti-covid, duke filluar nga matja e temperaturës, mbajtja e maskës, respektimi i distancës dhe higjienizimi i ambienteve tek shkollat ku procesi mësimor po zhvillohet sipas skenarit të kombinuar.