Manastirliu me Presidentin e Kroacisë në Kamëz: Investimi në arsim, mision fisnik për gjeneratat e ardhshme

Presidenti i Republikës së Kroacisë, Zoran Milanoviç, i shoqëruar nga zonja e parë, së bashku me Ministren e Arsimit dhe Sportit, Ogerta Manastirliu, kryetarin e Bashkisë Kamëz. Rakip Suli dhe përfaqësuesen e përhershme të UNDP në Shqipëri, Monica Merino, kanë vizituar nga afër laboratorin e ri të teknologjisë së informacionit, financuar nga qeveria kroate, në shkollën e re 9-vjeçare “Ahmet Zogu” në Kamëz.

Milanoviç dhe Manastirliu, kanë nënvizuar rëndësinë e investimeve në arsim, që u shërbejnë gjeneratave të ardhshme. “Jam vërtetë i lumtur dhe i emocionuar kur shoh që paratë e popullit kroat janë përdorur për një mision fisnik, që t’i bëjmë të rinjtë më të mirë, më të ditur dhe më të gatshëm për sfidat e sotme”,-tha Presidenti i Kroacisë.

Ministrja e Arsimit, Ogerta Manastirliu, i ka shprehur mirënjohjen Presidentit të Kroacisë, për solidaritetin e treguar dhe ndihmën e dhënë për investimet në arsim, pas tërmetit të 26 nëntorit 2019.

“Dua që të falenderoj përzemërsisht popullin kroat, Presidentin, për gjithë mbështetjen që na kanë dhënë, qoftë në rikonstruksionin e shkollave apo qoftë edhe në 8 laboratorët që kanë investuar në 6 bashkitë tona. Një investim në arsim, është një investim që zgjat gjithmonë në breza”,– tha Manastirliu.

Ministria e Arsimit dhe Sportit, në bashkëpunim me bashkitë dhe partnerët e huaj, po investojnë në 60 shkolla në të gjithë vendin, 30 prej të cilave janë drejt përfundimit, dhe duke filluar nga viti tjetër, hapen kantieret në 30 shkolla të tjera.