Në një kohë që apelon për dialog, kryeministri Edi Rama ka paralajmëruar një paketë të re masash ndaj personave të përfshirë në akte dhune gjatë protestave, duke përfshirë identifikimin e protestuesve të maskuar, përgjegjësinë financiare të familjeve për dëmet e shkaktuara nga të miturit dhe kufizimin e aksesit në shërbime të ndryshme.
Gjatë një takimi me drejtuesit e bankave, Rama u ndal te sulmet ndaj institucioneve financiare dhe dëmtimi i bankomatëve, duke i cilësuar këto akte si pjesë të një skenari që synon të krijojë panik.
“Do të nxjerrim paketën e masave, por duke investuar me shpejtësi në teknologji, do të nisim anonimizimin e profileve që nxisin dhunë. Do t’i ndjekim këmba-këmbës”, tha Rama.
Një nga masat e paralajmëruara lidhet me përdorimin e teknologjisë për identifikimin e personave që sipas qeverisë, përfshihen në akte dhune edhe kur përpiqen të fshehin identitetin.
“Do t’i zbulojmë ata që janë me kapuç, edhe sikur të rrinë me kapuç, edhe sikur ta mbulojnë të gjithë fytyrën, se do t’i ndjekim këmba-këmbës, përveç syve të teknologjisë”, u shpreh Rama.
Kryeministri u bëri thirrje qytetarëve të distancohen nga dhuna, ndërsa paralajmëroi se masat e reja do të synojnë edhe ata që nxisin akte të tilla. Rama paralajmëroi gjithashtu masa që do të përfshijnë edhe familjet e të miturve që shkatërrojnë pronën e të tjerëve.
“Do të vijë fatura në familje, do të paguajë familja. S’do të marrë shërbim nga shteti familja e një të mituri që vjen dhe djeg pronat e një tjetri”, deklaroi kryeministri.
Një tjetër element i paralajmërimit të kryeministrit lidhet me kufizimin e aksesit për personat që do të evidentohen si të dhunshëm, si brenda Shqipërisë, ashtu edhe në vendet e Bashkimit Europian.
“Ne do të vendosim në regjistër njerëzit e dhunshëm, do t’u mbyllim shumë aksese nëpër aeroporte, hotele, trena, të gjitha mjetet e transportit”, tha Rama.
Ai bëri të ditur se qeveria ka nisur bashkëpunimin me vendet e BE-së për këtë çështje. “E kemi nisur punën me vendet e BE-së, për t’u ndaluar aksesin në ato vende si njerëz të dhunshëm”, u shpreh ai.
“Dhuna s’ka për të pasur vend në këtë vend. Dialogu, shkëmbimi i ideve, ballafaqimi demokratik, ulja në tryezë për të gjetur rrugë të reja”, deklaroi kryeministri.