Mbledhja urgjente për pagat, prokurorët: Çështja do të ndiqet përmes rrugës ligjore

Pas mbledhjes urgjente në Prokurorinë e Përgjithshme, e thirrur për të diskutuar ngërçin e krijuar me pagat në sistemin e drejtësisë, ka ardhur edhe reagimi zyrtar i institucioneve pjesëmarrëse.

Në qëndrimin e bërë publik për mediat, Prokuroria e Përgjithshme njofton se palët kanë rënë dakord që çështja të ndiqet përmes instrumenteve ligjore. Synimi është gjetja e një zgjidhjeje për situatën e krijuar dhe rikthimi i funksionimit normal të institucioneve të drejtësisë.

Pas takimit, nuk është bërë i ditur një zgjidhje konkrete për ngërçin e pagave, ndërsa hapi i radhës pritet të jetë ndjekja e procedurave dhe mekanizmave që parashikon ligji.

Njoftimi i plotë

Sot, më datë 8 shtator 2026, në Prokurorinë e Përgjithshme u zhvillua një mbledhje e thirrur nga Prokurori i Përgjithshëm me pjesëmarrjen e drejtuesve të prokurorive, përfaqësuesve të Këshillit të Lartë të Prokurorisë dhe Shoqatës së Prokurorëve, lidhur me situatën e krijuar pas bllokimit të ekzekutimit të pagesave për pagat e muajit gusht 2026 të magjistratëve dhe administratës.

Gjatë mbledhjes u diskutua në mënyrë të detajuar situata e krijuar, si dhe nevoja për garantimin e zbatimit të kuadrit ligjor dhe financiar që rregullon pagat e magjistratëve dhe funksionimin normal të institucioneve të drejtësisë.

Të gjithë pjesëmarrësit vlerësuan se çështja kërkon një zgjidhje të shpejtë, të qartë dhe në përputhje me ligjin, në respektim të standardit kushtetues të vendosur nga Gjykata Kushtetuese, duke garantuar vijimësinë normale të funksionimit të institucioneve dhe respektimin e të drejtave të magjistratëve dhe punonjësve të administratës.

Në këtë kuadër, u dakordësua vijimi i trajtimit të kësaj çështjeje përmes instrumenteve ligjore, në funksion të garantimit të pavarësisë, funksionimit normal dhe qëndrueshmërisë së sistemit të drejtësisë”.