Mësimi online, sfidë për nxënësit me aftësi ndryshe

Në këtë kohë të pandemisë së Covid-19 ku gjithçka është pezulluar, mësimi online në Shqipëri ka probleme të mëdha. Mësuesit e shkollës speciale “Zëra jete” në Elbasan po përpiqen të zhvillojnë orët e mësimit me 61 nxënësit me aftësi ndryshe përmes internetit. Mësimi online me këtë shtresë ka qenë një sfidë me vetë sa për mësuesit por shumë më tepër për prindërit e këtyre nxënësve.

Drejtoresha e shkollës “Zëra jete” tregon për vështirësitë, por edhe efektet pozitive që po marrin nga kjo mënyrë ndryshe e të bërit mësim me këta nxënës special.

“Vështirësia kryesore këto ditë është e prindërit, pasi me këtë kategori fëmijësh duhet të kontaktosh me prindin, i cili përveç përkujdesjes, janë bërë mësues dhe psikologë për fëmijët e tyre”, thotë Rezarta Biçoku.

Pavarësisht vështirësive, që në këtë situatë janë për të gjithë dhe në mënyrë të veçantë për nxënësit me aftësi ndryshe, drejtoresha e shkollës speciale ka një apel për prindërit, por jo vetëm. “Prindërit e fëmijëve me probleme janë heronj të vërtetë. Do t’ia dalim me sukses nga kjo situatë që po kalojmë”, thotë Biçoku.