Mjekët paralajmëruan protestë, Policia: Nuk lejohen tubime për shkak të COVID. Rama i fton në takim

Shkresës me katër kërkesa të Sindikatës së Mjekëve, i është përgjigjur shefi i qeverisë. Kryeministri Edi Rama i ka kërkuar takimit grupit të mjekëve të QSUT që paralajmëruan një protestë për nesër. Rama i ka ftuar bluzat e bardha për një takim të enjten në 09:00 në zyrën etij.

Sindikata e Punonjësve të Shërbimit Shëndetësor ka parashtruar katër kërkesa që duan mjekët t’u plotësohen. Ata u kanë lënë një afat dyjavor institucioneve përkatëse për t’u kthyer përgjigje. Për këtë qëllim ditën e nesërmne paralajmëruan dhe një tubim protestë. Ndërkohë mësohet se Policia e Tiranës nuk u ka dhënë leje për protestë me argumentin e masave kundër përhapjes së koronavirusit.

Kërkesat e mjekëve:

1. Të shpallen dëshmorë të kombit të gjithë ata pjesëtarë të personelit shëndetësor të cilët humbin jetën në këtë luftë me këtë armik të padukshëm.

2. Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën dhe pas fatkeqësive të mundshme në këtë luftë.

3. Rritje e vlerësueshme e trajtimit financiar të personelit shëndetësor.

4. Personelit shëndetësor të çdo niveli t’i sigurohen të gjitha kushtet në punë për parandalimin e infeksionit sipas të gjithave standarteve kombëtare dhe ndërkombëtare.