GREQI: PARLAMENTI MIRATON NDRYSHIME PËR MARRJEN E NËNSHTETËSISË
93 për qind (162.186) e përfituesve të nënshtetësisë dhënë në vitet 2011-2017 janë nga Shqipëria.
Parlamenti grek ka miratuar mbrëmjen e të enjtes amendamentet e paraqitura nga ministria e brendshme.
Amendamentet e reja përmbajnë:
I.- Rritjen e periudhës së qëndrimit në Greqi, nga 7 në 12 vjet, si kusht për marrjen e nënshtetësisë me procedurën e natyralizimit.
12 vitet e qëndrimit do të duhet të jenë plotësuar para se i interesuari të paraqesë aplikimin.
Emigranti që do të aplikojë nuk nevojitet të ketë leje qëndrimi “të fuqishme”, siç kërkohej deri tani, por mjafton çdo leje e vlefshme qëndrimi, me përjashtim të provizoreve.
II.- Për marrjen e nënshtetësisë greke me lindjen apo ndjekjen e mësimeve në Greqi, tashmë përfitojnë edhe ata që kanë ndjekur një shkollë të huaj në Greqi, por që e cila duhet gjithsesi të ketë zbatuar programin grek të arsimit të detyrueshëm.
3. Certifikatat me gabime tash e tutje nuk do të jetë nevoja të korrigjohen me vendime gjyqësore. Ato do të bëhen me një akt të kryetarit të bashkisë.
* * *
Sipas këtij ligji krijohen hapësira të reja për marrjen e nënshtetësisë greke nga mërgimtarë të brezit të parë dhe të dytë qëndrues prej më shumë se 12 vjet në Greqi.
Ditë më parë Ministri i Brendshëm i Greqisë kishte deklaruar për “Ndryshimetë duhura ligjore, për të mundësuar dhënien e nënshtetësisë tek:
– Personat që kanë mbi 12 vite që qëndrojnë në Greqi,
– Grup moshat mbi 65 vjeç,
– Personat me aftësi të kufizuar,
– Pjesëtarët e komunitetit rom të lindur në Greqi…
Në Greqi, sipas njoftimeve zyrtare, jetojnë 850 mijë emigrantë.
Statistikat tregojnë se 174.394 nënshtetësi janë dhënë në 2011-2017.
93për qind (162.186) e përfituesve të nënshtetësisë janë nga Shqipëria.
A. Ashiku