Frigoriferi, kamera e sigurisë apo makina që drejtojmë mund të jenë më shumë sesa pajisje që na lehtësojnë jetën. Në epokën e internetit, ato mund të kthehen edhe në objektiva të sulmeve kibernetike. Një shembull konkret vjen nga Franca, ku një sulm ndaj sistemeve të ftohjes në supermarkete bëri që frigoriferët të ngrohnin ushqimet në vend që t’i ruanin ato.
Deri në 2 mijë supermarkete dyshohet se u prekën nga incidenti, duke shkaktuar humbje të mëdha financiare dhe hedhjen e produkteve ushqimore. Ngjarja riktheu shqetësimet për sigurinë e pajisjeve inteligjente, të cilat sot janë të lidhura me internetin dhe mund të kontrollohen nga distanca. Nga sistemet e ngrohjes dhe kamerat e sigurisë, te orët inteligjente dhe makinat, çdo pajisje e lidhur mund të krijojë një pikë të mundshme hyrjeje për hakerat.
Sipas ekspertëve, depërtimi në një pajisje mund të krijojë mundësi për të sulmuar edhe pajisje të tjera në të njëjtin rrjet. Megjithatë, Ciaran Martin, ish-drejtues i Qendrës Kombëtare të Sigurisë Kibernetike në Mbretërinë e Bashkuar, thekson se rasti francez nuk duhet të shkaktojë panik për të gjitha pajisjet inteligjente. Ai paralajmëron se shqetësimi është veçanërisht i madh për infrastrukturën dhe funksionimin e shërbimeve jetike.
Vëmendje të veçantë kërkojnë edhe automjetet moderne. Lidhja me internetin dhe sistemet dixhitale mund të ekspozojnë të dhënat personale dhe privatësinë e drejtuesve. Megjithatë, sipas ekspertëve, marrja e kontrollit të një makine nga distanca mbetet shumë e vështirë. Për t’u mbrojtur, rekomandohen përditësimet e rregullta të pajisjeve, fjalëkalimet e forta dhe aktivizimi i autentifikimit me shumë faktorë.
Sulmi në Francë tregoi se kërcënimet kibernetike nuk mbeten më vetëm në botën virtuale. Ato mund të prekin drejtpërdrejt ekonominë, sigurinë dhe jetën tonë të përditshme. Në një botë ku gjithçka po lidhet me internetin, siguria e pajisjeve është bërë pjesë e sigurisë sonë personale.