OSHEE: 150 punonjës në terren për stabilizimin e gjendjes

Kompania OSHEE ka analizuar situatën e krijuar në zonën Juglindore ku si pasojë e motit të keq kanë mbetur pa energji disa komuna e bashki.

Pas një analize të situatës, Operator i Shpërndarjes së Energjisë Elektrike ka shpallur gjendjen e emergjencës brenda kompanisë.

Rreth 22 brigada pune ku bëjnë pjesë 150 punonjës të 6 Drejtorive Rajonale, Shkodër, Gjirokastër, Tiranë, Durrës, Elbasan, Fier po punojnë për stabilizimin e gjendjes.

Në qytetin e Librazhdit është ngritur Shtabi i Emergjencës i drejtuar nga Drejtori i Departamentit të Shpërndarjes Petraq Lika.

Në dt 4 dhe 5 janar 2015 është arritur që të rikthehet energjia elektrike në 4508 abonentë. Në këtë kuadër është bërë identifikimi i abonentëve pa energji si dhe janë hartuar programet e punës për kthimin e energjisë sa më shpejt të jetë e mundur për të gjithë abonentët.

Për shkak të motit të keq si pasojë e temperaturave të ulëta dhe rrugëve të bllokuara nga bora dhe ngrica, mbeten problematike zonat: Qarrishta, Stërbleva, Sopoti, Gurakuqi, Stravaj.

Kompania OSHEE siguron të gjithë abonentët se do të bëhen të gjitha përpjekjet për kthimin sa më shpejt të energjisë elektrike deri në abonentin më të largët dhe më të fundit.