Pasuritë e doganierëve do të hetohen që nga viti 2003

Drejtoresha e Pergjithshme e Doganave Elisa Spiropali dhe Drejtori i Përgjithshëm i ILDKPKI, Shkëlqim Ganaj, nënshkruan të premten në Tiranë marrëveshjen e bashkëpunimit për komunikimin dhe shkëmbimin e të dhënave. Spiropali bëri të ditur se marrëveshja bëhet me synim marrjen e masave displinore ndaj personelit doganor që Inspektoriati e ka evidentuar apo propozuar për masa administrative ose edhe kallëzim penal. Ndërsa kreu i ILDKPKI-së theksoi se këtë vit ILDKPI do të fillojë kontrollin nga 2003 të të gjithë punonjësve të administratës doganore.

Drejtorja e Përgjithshme e Doganave  Elisa Spiropali në fjalën e saj u shpreh: “Kjo Marrëveshje Bashkëpunimi specifikon dhe adreson proçedurën e komunikimit dhe bashkëpunimit mes dy institucioneve. Ky dokument do t’i mundësojë  ILDKPKI-se të depërtojë më thellë në kryerjen e ekspertizës së specializuar të saj ndaj personelit doganor që është subjekt i ligjit për deklarim, dhe nga ana tjetër do të ndihmoje DPD nëpërmjet sinjalizimit për raste të dyshimta brenda administratës doganore, që kanë risk për korrupsion apo për konflikt interesi. Marrëveshja hap mundësinë për një komunikim të ndërsjellë më të shpejtë, më efikas, informacion që adresohet direkt tek strukturat përkatëse të DPD, tek Drejtoria e Anti-Korrupsionit dhe ajo e Burimeve Njerëzore me synim marrjen e masave disiplinore ndaj personelit doganor që ILDKPKI e ka evidentuar apo propozuar për masa administrative ose kallëzim penal”,- u shpreh Drejtorja e Përgjithshme e Doganave, ndërsa në fund shtoi se shpreson që kjo marrëveshje t’i rezistojë kohës dhe të sjellë produkt konkret në luftën kundër korrupsionit dhe krimit ekonomik.

Ndërsa Drejtori i Përgjithshëm i ILDKPKI Z. Shkëlqim Ganaj u shpreh i kënaqur për nënshkrimin e kësaj marrëveshje që sipas tij ka ardhur në momentin e duhur.  “Pas Tatimeve, Doganat janë struktura e dytë më e madhe përsa i përket punonjësve që kontrollohen nga ne, qoftë përsa i përket pasurisë ashtu edhe konfliktit të interesit. Strukturë e cila është e pakontrolluar 10 vjet me radhë dhe kjo është e rëndë. Kështu që këtë vit ILDKPKI do të fillojë kontrollin nga 2003 të gjithë strukturës, të gjithë punonjësve të Doganave, dhe ky memorandum bashkëpunimi ka ardhur në kohën e duhur dhe momentin e duhur në mënyrë që të gjithë zyrtarët që do të gjenden me shkelje të ligjit, përveç kallëzimit penal në organin e Prokurorisë, do të merren edhe masa administrative me largim nga puna. Zyrtarë të cilët gjenden në shkelje të ligjit dhe që fshehin pasurinë apo kanë konflikt të interesit nuk mund të jenë më të tillë.  Falënderoj drejtoreshën për bashkëpunimin e deritanishëm, dhe mendoj që në të ardhmen rezultatet do të jenë më konkrete dhe të qarta”, u shpreh Z. Ganaj.

Kjo Marrëveshje Bashkëpunimi ka për qëllim:

1. Realizimin e komunikimit dhe shkëmbimit të të dhënave me qëllim rritjen e efikasitetit dhe bashkërendimin e punës ndërmjet institucioneve për forcimin e luftës kundër korrupsionit dhe krimit ekonomik.

2. Koordinimin e punëve dhe aktiviteteve të përbashkëta në kuadër të  hetimit administrativ të zyrtarëve të administratës publike që mbartin detyrim për deklarim të interesave private, për të cilët ka filluar hetimi administrativ sipas përcaktimeve të ligjit nr. 9049, datë 10.4.2003 dhe ligjit nr. 9367, datë 7.4.2005.

3. Bashkëpunimin e palëve që do të realizohet mbi baza të njëjta dhe mbi parimin e reciprocitetit, përcaktuar në legjislacionin në fuqi.