Përplasi 5 këmbësorë dhe braktisi automjetin, arrestohet “piloti” nga Kamza

Ka përfunduar arratia për 39-vjeçarin P. B., banues në Kamëz, i cili ditën e djeshme shkaktoi një aksident të rëndë në rrugën “Halit Haxhija”, ku përplasi pesë këmbësorë dhe u largua nga vendi i ngjarjes.

Ngjarja ndodhi pasi i dyshuari, duke drejtuar një automjet tip “Audi”, kreu manovra të rrezikshme që çuan në humbjen e kontrollit dhe daljen nga rruga të mjetit. Për pasojë, u përplasën pesë qytetarë, të cilët u dërguan menjëherë në spital dhe ndodhen jashtë rrezikut për jetën.

Pas aksidentit, 39-vjeçari braktisi automjetin, i cili u sekuestrua më pas nga policia. Policia njoftoi se ndaj të arrestuarit janë referuar materialet procedurale në Prokurorinë e Tiranës, për hetime të mëtejshme.

Në vijim pritet të merren masa ligjore ndaj tij për veprimet e rrezikshme në trafik dhe largimin nga vendi i aksidentit.