Një dëshmi e rëndë vjen nga Spitali i Traumës, ku Ledion Balla po merr trajtim mjekësor pas dhunës së pretenduar nga katër punonjës të Policisë. Në një intervistë për emisionin investigativ “Fiks Fare”, i riu dhe nëna e tij kanë treguar detaje nga ngjarja dhe gjendja e tij shëndetësore.
Nga shtrati i spitalit, Balla ka rrëfyer momentet kur, sipas tij, u godit me forcë. Ai thotë se ndodhej në një lokal dhe po përpiqej të largohej, por rruga ishte e bllokuar.
“Ndjeva që u përplasa fuqishëm. Isha aty në lokal dhe nisa një herë të iki. Pastaj s’kisha ku shkoja se ishte rruga e bllokuar”, tregoi ai. I riu ka mohuar se ishte pjesë e protestës, ndërsa ka shprehur indinjatën për atë që i ka ndodhur. “Po nuk vritet njeriu kot. Me dal në rrugë e ça…”, u shpreh Balla gjatë bisedës.
Nëna e tij: I futën hekur në këmbë
Për gjendjen shëndetësore të Ledionit ka folur edhe nëna e tij, e cila i qëndron pranë gjatë shtrimit në spital. Ajo ka treguar se dëmtimet në këmbë kanë kërkuar ndërhyrje kirurgjikale dhe se pas kësaj faze do të nevojitet edhe fizioterapia. “Tani është në fazën e rikuperimit. I futën hekur nga gjuri e deri poshtë. O Zot, asnjë mos e pastë kismet”, ka deklaruar ajo. Sipas nënës, dëmtimi ka prekur kockën, ndërsa lëkura dhe enët e gjakut nuk janë dëmtuar. “Nuk i është dëmtuar lëkura apo enët e gjakut. Vetëm kocka është thyer, tjerat nuk janë”, rrëfeu ajo, duke përshkruar vështirësitë që po kalon i biri.
Ndërpritet biseda në spital
Në fund të takimit, në dhomën ku ndodhet Ledion Balla ka mbërritur edhe kryeinfermieri i spitalit. Sipas materialit të transmetuar nga “Fiks Fare”, ai i ka komunikuar bashkëpunëtores së emisionit se kishte mbërritur një urdhër që i riu të mos fliste me askënd. Ky zhvillim ngre pikëpyetje mbi rrethanat e komunikimit me të riun gjatë qëndrimit në spital, ndërsa dëshmia e tij dhe e nënës sjellin në vëmendje seriozitetin e dëmtimeve dhe nevojën për të sqaruar plotësisht ngjarjen. Rrethanat e incidentit dhe përgjegjësitë për dhunën e pretenduar duhet të verifikohen nga organet kompetente, përmes një hetimi të plotë dhe të paanshëm.