Presidenti francez, Emmanuel Macron, viziton Groenlandën në një sinjal të unitetit evropian, ndërsa SHBA synon ta marrë

Presidenti francez, Emmanuel Macron viziton sot Groenlandën, në një shfaqje mbështetjeje për territorin autonom danez të lakmuar nga presidenti i SHBA-së, Donald Trump.

Macron do të vizitojë Groenlandën së bashku me kryeministren daneze Mette Frederiksen, me udhëheqësit që planifikojnë të diskutojnë situatën e sigurisë në Atlantikun e Veriut dhe Arktik me kryeministrin e Groenlandës Jens-Frederik Nielsen.

Vizita e udhëheqësit francez shihet si një sinjal i unitetit evropian për Groenlandën dhe vjen disa orë përpara pjesëmarrjes së tij në samitin e G7-ës në Alberta, Kanada, në të cilin do të marrë pjesë edhe Trump.

”Bisedimet e Macron në Groenlandë do të trajtojnë gjithashtu zhvillimin ekonomik, ndryshimet klimatike dhe energjinë e rinovueshme”, tha zyra e tij.

Ai pritet të vizitojë një akullnajë të kërcënuar nga ngrohja globale dhe një hidrocentral.

”Bisedimet politike janë planifikuar në bordin e një fregate daneze”, sipas Pallatit Élysée.

Tensionet kanë vijuar që kur Trump ringjalli një ide nga mandati i tij i parë për të fituar kontrollin e Groenlandës, një territor vetëqeverisës brenda Mbretërisë së Danimarkës që presidenti amerikan beson se është strategjikisht i rëndësishëm si për mbrojtjen ashtu edhe si burim pasurie minerale.

Duke nënvizuar këto ambicie, zëvendëspresidenti amerikan JD Vance vizitoi bazën ushtarake amerikane në Groenlandën veriore në mars, ku ai kritikoi aleaten e NATO-s, Danimarkën, për “investim të pamjaftueshëm” në popullin dhe sigurinë e territorit.

Groenlanda dhe Danimarka i kanë hedhur poshtë kategorikisht qasjet e Trump.
ATSH